Media-icmal 30.04.21

“Yenisabah.az” saytı “Lavrov yenə Bakıya gəlir... - Hər iki tərəf üçün “sürpriz” təklifləri var” sərlövhəli məqalədə Rusiya xarici işlər naziri Sergey Lavrovun mayın 10 və 11-də Azərbaycana gözlənilən səfərinin mümkün nəticələrini dəyərləndirir. 

Bu gözlənilən səfərə şərh verən politoloqlar Lavrovun səfərlərinin Azərbaycan üçün heç zaman xeyirli olmadığı düşüncəsindədirlər. 

Siyasi şərhçilər yada salırlar ki, 2016-cı ilin aprelində Bakıya gələn Lavrov Qarabağ məsələsilə bağlı “həll planının” işə düşəcəyi vədi verdi, amma Bakını tərk etdikdən sonra bütün deyilənlər unuduldu. 

Politoloqlar deyirlər ki, Lavrov hər iki tərəfə “sürpriz təkliflər” vəd edir, belə ki, mayın 5-də Lavrov İravana gedir. mayn 6-da Moskvaya qayıdır. Mayın 10-də isə Lavrov Moskvadan Bakıya gəlir.

Politoloqlar hesab edirlər ki, bu siyasi kombinasiyada Lavrovun həm də Türkiyə prezidenti Ərdoğanı qabaqlamaq kimi niyyəti var, çünki Lavrova qədər Ərdoğan Ramazan  bayramında Şuşaya səfər etmək niyyətini açıqlamışdı.

Şərhçilər deyirlər ki, Bakı və Ankara səfər hazırlıqlarına başlayıb və Ərdoğanın aprelin 24-də İlham Əliyevlə telefon danışığından sonra “birgə addımlar” atılacağı ifadəsi Moskvanı ciddi narahat edir.

Şərhçilər deyilər ki, Lavrov Bakıya hansı təkliflə gəlirsə-gəlsin, Kremlin hiyləsinə aldanmaq olmaz: “Rusiyanın Qarabağdakı hərbiçiləri Xankəndidə “hərbi parad” keçirəcək və bundan bir gün sonra Lavrov Bakıya gəlib bizi sakitləşdirməyə və “balanslı xarici siyasəti” qorumağa çağıracaq. Rusiya Azərbaycan üçün Türkiyə ilə eyni deyil, ola da bilməz, deyə şərhçilər gözlənilən səfərə şərh veriblər.

“Yeniavaz.com” saytı isə “Ramazan bayramı günlərində sərt karantin ola bilərmi?” sərlövhəli məqalədə nəzərdə tutulan müddətdə sərt karantin rejiminin tətbiqi mümkünlüyünü şərh edir.

Milli Məclisin Səhiyyə Komitəsinin sədr müavini Rəşad Mahmudov deyir ki, hazırda Azərbaycanda epidemioloji vəziyyət Ramazan bayramı günlərində sərt karantin rejiminin tətbiq edilməsinə ehtiyac yaratmır.

R.Mahmudova görə, Azərbaycanda xüsusilə son günlərdə yoluxmanın nisbətən sabitləşməsi, hətta azalması yoluxanlarla sağalanlar arasında nisbətin müsbət tendensiya tərəfə dönməsi bayram günlərində sərt karantin tətbiqi ilə bağlı qərarın alınmasına ehtiyac olmayacağını göstərir.

Bundan irəli gələrək, R.Mahmudov hesab edir ki, bütün bunları nəzərə alaraq vəziyyətin bu şəkildə davam etdiyi müddətdə xüsusi sərt qapanma rejiminə və ya rejimin ağırlaşdırılmasına ehtiyac olmayacaq”.

“Moderator.az” saytı isə “Sülhməramlıların, Ermənistan və yaxud Azərbaycanın rəsmi informasiyası yoxdursa...”  sərlövhəli məqalədə deputat Fəzail Ağamalı ilə erməni yaraqlılarının Qarabağdan çıxarılması prosesini müzakirə edirlər. 

Bu məsələnin aktuallaşmasına səbəb bu günlərdə sosial media səhifələrində erməni yaraqlılarının Xankəndindən çıxarıldığına dair video-görüntülərin yayılmasıdır.

Müəllif belə videoların yayılmasına baxmayaraq, erməni yaraqlılarının Xankəndindən və Qarabağdan çıxarılmasını ciddiyə almır. 

Deputat Fəzail Ağamalı hesab edir ki, yayılan görüntülər rəsmi xəbərlərlə təsdiqlənmədiyi üçün onlara inanmaq olmaz: “Hər-halda rəsmi məlumat yoxdursa, erməni qoşunlarının Qarabağdan çıxarılmasıyla bağlı yayılan məlumatlar dezinformasiya hesab oluna bilər. Bununla bağlı Rusiyanın sülhməramlı qüvvələrinin, Ermənistan və yaxud da Azərbaycan tərəfinin rəsmi şəkildə informasiyası yoxdursa, bunu dəqiq və doğru informasiya qəbul etmək olmaz”, deyə deputat bildirir.

Ona görə indi rəsmi fakt olan budur ki, erməni qoşunlarının tör-töküntüləri Qarabağdadır, ermənilərin kompakt yaşadığı yerlərdə də özlərini kişi kimi təqdim edənlər orduya yazılırlar. Deputat deyir ki, bütün bu faktlar var və bunu ermənilər özləri də etiraf edirlər.

“Müsavat.com” saytı “Baydenin “genosid hədiyyəsi” Ermənistana təzyiqləri artırdı: Azərbaycan və Rusiya hərəkətə keçdi” sərlövhəli məqalədə müəllif ABŞ prezidentinin aprelin 24-də “erməni soyqırımı” ifadəsi işlətməsindən sonra ictimai-siyasi müstəvidə nələrin dəyişdiyini şərh edir. 

Müəllifə görə, bu ifadə işləndikdən sonra Kremldən Ermənistana gözlənilən seçkilərdə kimin qalib gələcəyini Rusiyanın müəyyən edəcəyi xəbərdarlığı edilib.

Müəllif deyir ki, daha bir dəyişiklik Azərbaycanın Rusiyanı üçtərəfli anlaşmaların icrasına məcbur etməyə başlamasıdır.

Müəllifin düşüncəsinə görə, Ermənistan geopolitik labirintə düşüb, yol tapmaqda çətinlik çəkir və hansı istiqamətdə hərəkət edəcəyini bilmir və hazırda "pat vəziyyəti" yaradır.

Müəllifin fikrincə, Ermənistanın çıxış yolu Azərbaycan və Türkiyə ilə normal münasibətlər qurmasından keçir, amma ənənəvi ideoloji prioritetlər buna imkan vermir, bu problemin həllinə imkan verə biləcək zaman isə, demək olar ki, mövcud deyil.

Müəllifin iddiasına görə, ABŞ prezidenti Co Bayden erməni diasporuna və Ermənistana "genosid" ifadəsini yalnız ermənilərə olan dərin rəğbətindən deyil, həm də geopolitik maraqları baxımından səsləndirib, qarşılığında ciddi təşəkkür gözləyir.

Müəllifə görə, rəsmi İrəvan hazırda Ermənistanı ABŞ-a təslim edə biləcək durumda deyil və Ağ Ev Ermənistanın milli təhlükəsizlik maraqlarına təminat verməkdə çətinlik çəkir. ABŞ-ın isə Cənubi Qafqazda belə mexanizmləri yoxdur. Bu isə o deməkdir ki, Rusiya yaxın gələcəkdə Ermənistanı öz istifadəsində saxlamağa çalışacaq, bunun üçün ABŞ-dan fərqli bir sıra təsir mexanizmlərə malikdir.