Media-icmalı 31.01.18

Ölkə regionlarının inkişafı, Bayıl yamacındakı sakinlərin durumu, ləyaqətli siyasi mübarizə məsələsi bugünki (31 yanvar, 2018-ci il) medianın aparıcı mövzularındandır...

Ölkənin regional inkişaf istiqaməti

"Azərbaycan" qəzeti "Azərbaycan iqtisadiyyatı yeni regional mərkəzlərin yaradılması ilə növbəti keyfiyyət mərhələsinə qədəm qoyub" sərlövhəli məqalədə bu keyfiyyət mərhələsini deputat Hikmət Babaoğlu ilə dəyərləndirir.

H.Babaoğlu deyir ki, Azərbaycan regionlarının 2014-2018-ci illərdə sosial-iqtisadi inkişafı Dövlət Proqramının icrasının dördüncü ilinin yekunlarına həsr olunmuş konfransda Prezident İlham Əliyev 2004-2017-ci illərdə ölkənin sosial-iqtisadi inkişafının mühüm göstəricilərinin inkişafının sürətlə getdiyini vurğulayıb.

Deputat deyir ki, dövlət başçısı hələ 2003-cü ildən ölkə regionlarının inkişafını əsas fəaliyyət istiqamətlərindən biri kimi görüb: "İqtisadiyyatın rəqabət qabiliyyətli olması və resursların iqtisadi inkişafa cəlb edilməsi üçün regionların sosial-iqtisadi inkişafı xüsusi əhəmiyyət kəsb edir. Bu gün milli iqtisadiyyatımızın hazırki inkişaf göstəricilərinin təmin olunması prosesində dövlət proqramları mühüm rol oynayıb".

Ölkədə qaçqın və məcburi köçkünlərin problemlərinə toxunan deputat son 14 ildə 265 min köçkün ailəsinə yeni evlər verildiyini söyləyir: "2018-ci ildə yenə 20 min köçkün ailəsi yeni evlərlə təmin ediləcək. Bu, Azərbaycanda sosial təminatı zəif olan təbəqəyə qarşı münasibətin göstəricisi olmaqla bərabər, həm də qaçqın və məcburi köçkünlərin problemlərinin həllinin daim diqqətdə olduğunu göstərir".

H.Babaoğlu özünüməşğulluq məsələsini də kənara qoymur, bu sahədə ailə biznesinin inkişafı üçün layihələr icra edildiyini, bunun isə həm də regionların inkişafına səbəb olduğunu bildirir.

Deputat regionların qazlaşdırılması, enerji təchizatı, yol tikintisi kimi layihələrin də diqqət mərkəzində olduğunu deyir: "Azərbaycanda 18 iqtisadi rayon var və hər bir iqtisadi rayonun ixtisaslaşmış sahələri var. Regional iqtisadiyyat qurularkən yerli xüsusiyyətlər nəzərə alınmaqla ixtisaslaşma aparılıb. Bu da iqtisadi rayonların əmək qüvvələri və istehsal münasibətlərinin mütənasibliyini təmin etməklə, regionlardakı inkişafı daha da sürətləndirib".

H.Babaoğlu deyir ki, ötən 14 il ərzində Azərbaycan iqtisadiyyatına 231 milyard dollar həcmində sərmayə qoyulmasını mühüm və sabit sərmayə mühitinin olmasının göstəricisi kimi dəyərləndirir.

Deputat bildirir ki, ölkə yeni regional iqtisadi mərkəzlərin yaradılması ilə növbəti inkişaf mərhələsinə qədəm qoyub, bu isə iqtisadiyyatın davamlı tərəqqisini təmin edir.

"Sürüşmə" sakinləri: Məqsəd bizi köçürməkdir

"Yeni Müsavat" qəzetində isə diqqəti "Bayıldan xəbər var: "Evlərimizi qəzalı kimi göstərib, bizi bayıra atıblar" sərlövhəli məqalə cəlb edir.

Müəllif Bayı yamacındakı sürüşməni, buradakı sakinlərin durumuna qədərki problemləri gündəmə daşıyır.

Müəllif deyir ki, Bayıl yamacında, Bakı Televiziya Qülləsi yaxınlığındakı sürüşmə zonasında bərkitmə işləri gedir və sürüşmə ərazisində yerləşən, təhlükəli sayılan 250-yə yaxın evin qeydiyyatı bir neçə günə yekunlaşacaq.

Sakinlərlə həmsöhbət olduğunu deyən müəllif onların narahatlıqlarını da bildirir: "Sakinlərin sözlərinə görə, ərazidə təhlükə hələ də qalmaqdadır. Həmin ərazidə müvafiq qurumlar iş aparırlar. Sürüşmə zonasının ən aktiv hissəsində məskunlaşan sakinlər təxliyə edilərək, müvvəqqəti sığınacaqlara köçürülüblər. Təhlükəsizliyə görə boş evlərə qaz və elektik verililmir".

Müəllif deyir ki, elə ərazidə olduğu zaman 50-yə yaxın sakin sürüşmə zonasına yaxın yerdə kommunal xətlərin kəsilməsinə narazılıq ediblər: "Bir həftədir ki, kommunal problemlərdən əziyyət çəkirik, bayırda ocaq qalayıb, yemək bişiririk. Biz də anlayırıq ki, ərazi sürüşmə zonasıdır və təhlükə riski var. Ancaq bizi də başa düşməlidirlər ki, bizim üçün çox çətindir".

Yazı müəllifi vurğulayır ki, hadisə yerində olan Səbail rayon İcra Hakimiyyəti əməkdaşlarının fikirlərini almağa çalışsa da, məmurlar danışmaqdan imtina ediblər.

Məqalədə deyilir ki, evləri qəzalı durumda olan və sürüşmə zonasına yaxın məskunlaşan sakinləri rayon ərazisində müvvəqqəti sığınacaq kimi 163 saylı məktəbə yerləşdiriblər.

Müəllif bəzi sakinlərə istinadən deyir ki, evləri sürüşmə zonasından xeyli uzaqlıqda yerləşir, hər hansı çat və ya sürüşmə yoxdur, bununla belə, evlərini qəzalı kimi qələmə veriblər.

"Kommunal xətləri kəsib, özümüzü də ərazidən uzaqlaşdırıblar. Sürüşmə zonasında yaşayan ailələri köçürdükləri müvvəqqəti sığınacağa bizi də köçürmək istəyirlər. Məqsədləri bizi uzaq yerlərə köçürməkdir. Həmin məktəbdə isə vəziyyət çətindir. Kişilər və qadınlar ayrı-ayrı yerlərdə qalırlar".

Müəllif sakinlərə istinad edərək məktəbdə məskunlaşanların çoxunun kirayədə yaşayanlar olduğunu deyir, əvvəlcə deyiblər ki, iki gün sığınacaqda qalın, başqa yerə köçürəcəyik, həmin iki gün keçib, amma verilən vəd yalan çıxıb.

Ölkənin "ləyaqət kürsüsü" döyüşü

"Azadlıqinfo.az"da isə "Siyasi mübarizə və ləyaqət" sərlövhəli məqalə oxumaq olar.

Müəllif mənəvi keyfiyyətlərə söykənən ləyaqətli siyasi mübarizə məsələsini müzakirəyə çıxarır: "Mənəvi keyfiyyətlər heç vaxt köhnəlməz və ya müasirləşməz, tərifini dəyişməz, çəkisini itirməz. Yəni ləyaqət, qürur, xeyirxahlıq, cəsarət, əxlaq anlayışları həmişəyaşardı. Heç bir dövr, idarəçilik, situasiya bu dəyərlərdən imtina etməyə bəraət qazandırmır".

Müəllif deyir ki, məhz bu mənəvi keyfiyyətlər insanı digər canlılardan fərqləndirir və bu dəyərlərdən imtina edən şəxs ölkəsinə, ətrafına, ailəsinə də yararlı ola bilməz.

Bu qısa izahdan sonra müəllif iddia edir ki, Azərbaycanda dəyərlər baş-ayaq düşüb və kütlə yanlış düşüncəyə sürüklənir: "İrəli getmək üçün yaltaqlanmaq yolu tutan, başqasına çamur atmaq qərarı verən, zalımın qarşısında əyilmək fikrinə düşən adam ləyaqətsizliklə ittifaqa can atır. Yəni, onun düşündükləri yavaş-yavaş əməlində özünü göstərir və nəticədə "ləyaqətsiz insan"a çevrilir".

Müəllif hesab edir ki, xalq susanda, qorxuya təslim olanda, özünəinam hissini itirəndə mənəviyyatsızlıq hökmrana dönür.

Yazı müəllifinə görə, indi Azərbaycanda bir qrup insanın mübarizə aparması, çətinliklərə sinə gərməsi, məhrumiyyətləri gözə alması "hakimiyyətə gəlmək istəyi" deyil, daha dərin qata malikdir: "İndiki situasiyada ləyaqət, qürur, mənəvi dəyərlər uğrunda mübarizə gedir. Əgər bu adamlar təslim olsa, bu proses tamam dayansa, etiraz ocağı sönsə, bu ölkəyə başsağlığı vermək lazım olacaq".

Müəllifə görə, indiki situasiyada mübarizə aparmaq və mübarizə aparanlara dəstək olmaq hamının borcudur, çünki əks halda yalan, yaltaqlıq, oğurluq, böhtan, qorxaqlıq adiləşərək normaya dönəcək.

Müəllif deyir ki, bu gün cəmiyyətin qüruru, ləyaqəti təhdid altındadır və buna doğru addımlar atılır.

Yazı müəllifinə görə, mübarizənin çətinliyi Azərbaycanın demokratik ölkə olmamasında, hakimiyyətin sivil mübarizə aparmamasında, belə ölkədə real müxalifət mövqeyindən çıxış etməyin təhlükəli, çətin olmasındadır.

Müəllif hesab edir ki, elə buna görə də indi Azərbaycanda siyasi mübarizə hakimiyyət kürsüsü yox, "ləyaqət kürsüsü" uğrunda gedir: "İlk növbədə cəmiyyəti ləyaqət ovçularından təmizləmək lazımdır, adamlar şüurlu şəkildə həyatlarını bu mübarizəyə həsr ediblər, zindanı gözə alıblar, gəncliklərini qurban veriblər".

Müəllif vurğulayır ki, belə bir mübarizə qələbəsiz də alqışa layiqdir, çünki bu adamlar olmasaydı, indi Azərbyacan barədə keçmiş zamanda danışmaq lazım gələrdi.