Məhərrəmlik başladı

Noyabrın 5-dən İslam il hesablaması olan hicri-qəməri təqvimilə 1435-ci il başlayır. 

Hicri-qəməri il təqvimində Məhərrəm ayı ilk aydır. Bu il hesablaması ay təqvimi ilə aparıldığı üçün il 355 və 356 günə başa çatır. 

Amma Məhərrəm ayı dini baxımdan Azərbaycan üçün fərqli dəyərə malikdir. Belə ki, sonuncu peyğəmbər Mühəmməd Peyğəmbər (ə.)-ın nəvəsi, Həzrəti Əlinin oğlu İmam Hüseyn məhz Məhərrəm ayının 10-da qətlə yetirilib. Bu qətl günü qısaca Aşura adlanır (aşura ərəb dilindən tərcümədə “10-cu gün” deməkdir).  

Şiə dünyasının ən böyük hüzn məraismi bu aya təsadüf edir. Bu il Aşura noyabrın 14-nə təsadüf edir. Şiəliyin yayılıdğı ölkələrdə, o cümlədən, Azərbaycanda bu iki ayda şənliklər, toylar dayanır.  

İmam Hüseynin qətli ilə bağlı mərasimlər Aşura günü yox, Məhərrəm ayının 1-ci günündən başlanır. Çünki İmam Hüseyn özü və tərəfdarları bu 10 gün ərzində Yezidin qoşunlarının mühasirəsində qalsa da təlsim olmaq çağırışlarını qəbul etmir. Ona görə də qətl günü - Aşuraya qədərki 10 gün İmam Hüseynin və tərəfdarlarının fədakarlığı kimi qeyd edilir. Minbərə qalxan din xadimləri bu 10 gün ərzində İmam Hüseynin məruz qoyulduğu məhrumiyyətlər haqda danışırlar. 

Aşura günündə, yəni, Məhərrəm ayının 10-da xüsusi təziyyə məclisləri təşkil edilir, bu qətllə bağlı mərsiyyə, növhələr altında sinə, zəncirvurma mərasimləri olur. 

Beləliklə, Aşura günündən hesablanmaqla, İmam Hüseynin qətlə yetirilməsilə bağlı 40 gün çəkən hüzr və hüzn mərasiminin 20 günü Məhərrəm, 20 günü isə ikinci ay olan Səfər ayına təsadüf edir. Hüzn mərasiminin 20 günü Səfər ayına təsadüf etdiyinə görə şiə dünyası bu ayın qalan 10 gününü də hüzn mərasiminə aid edərək bu iki ayda şənlik və toy etmirlər. Bu qətl və hüzn mərasimilə bağlı xalq içində bu iki ay “ağır aylar” adlanır.-05-