Məhkəmə A.Abdullayev barəsində həbs qətimkan tədbirini dəyişdirmədi

Bazar ertəsi Bakı Ağır Cinayətlər Məhkəməsində AMAY şirkətinin rəhbəri Abdulla Abdullayev və təqsirləndirilən daha 5 nəfər üzərində növbəti məhkəmə prosesi keçirilib.

Məhkəmə prosesində vəkil Osman Kazımov yazılı vəsatətlə çıxış edib. Vəkil hazırda məhkəmədə araşdırılan cinayət işinin əslində bir mülki iş olduğunu deyib və buna görə də bu işə xitam verilməsini istəyib. Daha sonra O.Kazımov A.Abdullayevə irəli sürülən dələduzluq, külli miqdarda dövlət vəsaitini mənimsəmə, səlahiyyətindən sui-istifadə, çirkli pulların leqallaşdırılması ittihamlarının araşdırma nəticəsində özünü doğrultmadığını deyib. Belə ki, ittiham tərəf Atatürk prospekti 80/78-37-də tikilən hündürmərtəbəli binanın tikintisi zamanı müştərilərin vəsaitlərinin mənimsənilməsi ittihamı irəli sürüb. Amma həmin binada mənizl alan 100-ə qədər sakin məhkəmə dindirməsi zamanı pullarının mənimsənilmədiyini, binanın tikildiyini, mənzillərinin özlərinə aid olduğunu deyərək ittihamın yalan olmasını ortaya qoyublar.

Bundan əlavə, vəkil bu məsələ üzrə ititham tərəfə hələ məhkəmənin başladığı ilk günlərdən sübutlar təqdim etmək vəsatətləri qaldırsa da, vəsatətin təmin olunmamasına diqqət çəkib. O.Kazımov “zərərçəkən” kimi tanınan şəxslərin məhkəmədə müdafiə tərəfin xeyrinə ifadə verdikləri üçün ittiham tərəfin onların məhkəməyə gəlmələrinə maraqlı olmadığını bildirib. Yeri gəlmişkən, bu məsələ üzrə mövqe bildirən digər vəkil Əkbər Bağırov ittiham tərəfi məhkəmənin işini “iflic” hala salmaqda suçlayıb.

Daha sonra vəkil O.Kazımov 2007-11-ci illərdə “Texnikabank” və Sahibkarlığın İnkişafına Yardım Fondundan götürülən maliyyə vəsaitlərinin mənimsənilməsi ittihamına da toxunub. O, vəsatətində adı çəkilən müəssisələrdən götürülən vəsaitlərin AMAY şirkətinə məxsus “Xətai” ticarət mərkəzinin dam örütyünün bağlanmasına xərcləndiyini deyib. Vəsaitin xərclənməsi sahəsinin məlum olduğu, pulun müqabilində girovlar qoyulduğunu deyən vəkil burada ittiham tərəfin hansı əsasla mənimsəmə ittihamı sürməsinin aydın olmadığını deyib. Üstəlik, hər iki quruma olan borclar ödənib.

Səlahiyyətindən sui-istifadə ittihamına gəlincə, A.Abdullayevin “Birlikbank”ın Müşahidə Şurasının sədri olmasına diqqət çəkən vəkil bu halda onun sərəncamverici səlahiyyəti olmadığını nəzərə çatdırıb. Ona görə bu ittihamın da əsassız olduğunu bəyan edib.

Çirkli pulların leqallaşdırılması ittihamına gəlincə, vəkil O.Kazımov bu ittihamla bağlı cinayət işində hər-hansı sübut olmadığını deyib və ittihamın uydurma olmasını vurğulayıb.

Daha sonra vəkil A. Abdullayevi həbsdə saxlamaq üçün ittiham tərəfin istintaqdan yayınma, gizlənmək kimi əsaslar göstərməsinə toxunub. “Zərərçəkənlərin” məhkəməyə gətirilməsində A.Abdullayevin xüsusi rolu olduğunu deyən vəkil bunu təqsirləndirilən şəxsin məhkmədən gizlənmək məramı olmaması kimi dəyərləndirib. Vəkil ittihamlar əsassız olduğu üçün A.Abdullayev barəsində həbs qətimkan tədbirinin ev dustaqlığı ilə əvəzlənməsini tələb edib.

Verilən vəsatətlə bağlı müşavirəyə gedən məhkəmə heyəti qayıtdıqdan sonra vəsatətin təmin olunmadığını bildirib.

A.Abdullayev 2014-cü ilin aprelində həbs edilib. Ona qarşı dələduzluq, dövlət vəsaitlərini külli miqdarda mənimsəmək, səlahiyyətindən sui-istifadə, çirkli pulların leqallaşdırılması itithamları irəli sürülüb. A.Abdullayev itithamları rədd edərək özünü təqsirli saymır. -05C-