Məhkəmə iş adamını həbsdə saxlamaq qərarı verib

Bakı Apellyasiya Məhkəməsi cümə axşamı keçirlən iclasında AMAY şirkətlər qrupunun prezidenti Abdulla Abdullayev barəsində həbs qətimkan tədbirinin qüvvədə saxlanması qərarı çıxarıb. Bu haqda A.Abdullayevin vəkili Əkbər Bağırov bildirib.

Haqqında danışılan məsələni mülki iş adlandıran vəkil buna görə həbs qətimkan tədbiri seçilməsini əsassız adlandırıb. Vəkil Apellyasiya Məhkəməsinin qərarını, A.Abdullayev barəsində cinayət işi başlanmasını, həbsini qanunsuz sayıb. A.Abdullayev barəsində həbs qətimkan tədbiri seçilməsinə zərurət olmadığını deyən Ə.Bağırov iş adamının daimi yaşayış yeri olduğu, istintaqdan gizlənmədiyin üçün bu addımı əsassız adalndırıb. 

Xatırladaq ki, A.Abdullayev aprelin 4-də həbs edilib. Baş Prokurorluq həbsə əsas kimi İqtisadiyyat və Sənaye Nazirliyi yanında Sahibkarlığa Kömək Milli Fondundan daxil olmuş materialları  göstərib. Bunun əsasında Korrupsiyaya Qarşı Mübarizə Baş İdarəsində araşdırılma aparılıb. Toplanan sübutlar əsasında Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb. 

A.Abdullayev 2006-2008-ci illərdə Sahibkarlığa Kömək Milli Fondunun xətti ilə kənd təsərrüfatı və s. sahələrin inkişafına yönəlməsi nəzərdə tutulan 3 milyon 397 min manat məbləğində vəsait götürüb. Istintaq iş adamını bu pulları rəhbəri olduğu “Birlikbank”ın hesablarına köçürülməsinə nail olmaqla AMAY-ın təmir-tikinti işlərinə sərf etməkdə ittiham edir. İstintaq bunu dövlətin qanunla qorunan mənafelərinə ağır zərbə vurmaq, özgənin külli miqdarda əmlakını mənimsəmək kimi dəyərləndirir. Bundan irəli gələrək əsaslar olduğu üçün cinayət məcəlləsinin adı çəkilən maddələri üzrə ittiham elan olunduğu və barəsində məhkəmə qərarı ilə həbs qətimkan tədbiri seçildiyi bildirilir. -05D-