Məktəblilər və natiqlik qabiliyyəti

Bazar ertəsi Media Mərkəzində keçirilən mətbuat konfransında “Demokratiyanın və milli dəyərlərin təbliği” İctimai Birliyinin sədri Əli Cəfərov “Şagirdlərin nitq hazırlığı və natiqlik qabiliyyətlərinin inkişafına dəstək” adlı layihənin yekunları barədə danışıb. 

Onun sözlərinə görə, dörd ay müddətinə nəzərdə tutulmuş layihənin dəyəri 5 min manatdır və prezident yanında QHT-yə Dövlət Dəstəyi Şurasının proqramı çərçivəsində həyata keçirilib.

Layihə 317 saylı orta məktəbdə keçirilib. Layihəni ali məktəb müəllimləri həyata keçiriblər. Layihəyə 10-11-ci sinif şagirdləri olan 35 məktəbli cəlb edilib. Onlar iki qrupa bölünüb. Ümumilikdə, 12 treninq keçirilib.

“Məqsəd şagirdlərdə nitq mədəniyyətini, akademik, siyasi və bədii çıxışlar etmək bacarığını inkişaf etdirməkdir. Biz şagirdlərə auditoriyanı, onun intellektual potensialını və yaşını qiymətləndirməyi, auditoriya ilə ümumi dil tapmaq bacarığını öyrətdik. Jest və mimika, auditoriya ilə davranış qaydaları haqda danışdıq”, - Ə.Cəfərov bildirib.

Sonda şagirdlərə həvəsləndirici diplomlar verilib. Onların arasında sorğu və qiymətləndirmə testi aparılıb. “Məqsədimiz həmçinin tədris prosesinə yardım göstərmək idi, çünki toxunduğumuz mövzu bilavasitə ədəbiyyata aid idi”, - o qeyd edib. -04S-