1 mlrd manata Global services nə iş görəcək?

"Azəriqaz" İB "Global Services" ilə podrat mqaviləsi bağladığını təsdiq edib. 

İB-də Turan-a deyiblər ki, 24 iyunda tenderə yekun vurulub və Global Services qalib elan edilib. Buna qədər "Azəriqaz" 36 şirkətə təklif göndərib. Amma tender təklifini 7 şirkət qəbul edib. Son tura 3 şirkət qalıb: "Global Services", Tekfen İnşaat və "Olimp mühəndislik". Ən aşağı qiyməti Global Services təklif edib - 1 mlrd 71 mln 63 min.

Buna görə şirkətlə müqavilə bağlanılıb və 21 iyulda "Respublika" qəzetində İB-nin elanı verilib. 

"Azəriqaz"da məlumat veriblər ki, Global Services 45 müxtəlif  yönlü firma və şirkətdən ibarət alyansdır. Podratçı seçiləndə şirkətlərin təcrübəsi ilə yanaşı, müvafiq struktur və institutlardan sertifikatının olması kimi meyarlar da nəzərə alınıb. 

Global Services hansı müddətə nə işlər görməlidir? Layihəyə 32÷530 mm diametrli 1877 km polad daşıyıcı və paylayıcı qaz kəmərlərinin, 25÷400 mm diametrli 19377 km polietilen daşıyıcı və paylayıcı qaz kəmərlərinin, 463514 ədəd qaz sayğacının (o cümlədən 48145 ədəd “smart-kart” tipli elektron qaz sayğacının, 415369 ədəd mexaniki qaz sayğacının) və bununla bağlı 20÷25 mm diametrli 20896 km boru xəttinin quraşdırılması, 439189 ədəd fərdi qaz tənzimləyicilərinin, 1162 ədəd qaztənzimləyici şkafların, 80 qazpaylayıcı stansiyada yeni tənzimləyici və nəzarət-ölçü avadanlıqlarının quraşdırılması daxildir.

“Azəriqaz”da deyiblər ki, 2013-cü ilin sonuna qədər respublikanın müxtəlif bölgələrində 463514 mənzilin qazlaşdırılması nəzərdə tutulub. 

Əsas hədəf 2013-cü ilin sonuna qədər 95 faizə çatdırılmasından ibarətdir. 

Xatırladaq ki, 1 iyul 2012-ci il üçün ölkədə qazlaşdırma səviyyəsi 76,2% (“əhali” kateqoriyasından 1 403 049), o cümlədən Bakı şəhərində 632068 əhali abonenti olmaqla 96,2 faiz, regionlarda 770981 əhali abonenti olmaqla 65,2 faiz təşkil edib. --12D--