Mənzil tikintisi ilə bağlı aldatmalar davam edir

Bu gün Reportyorların Azadlıq və Təklükəsizlik İnstitutunda  “Fuad LTD” MMC tərəfindən aldadılan bir qrup zərərçəkmiş növbəti mətbuat konfransını keçirib.

Sakinlər Fuad MMC-nin direktoru Qasım Məmmədov tərəfindən üzləşdikləri problemlərlə bağlı  öz şikayətlərini jurnalistlərə çatdırıblar.   

Belə ki, 2005-ci ildə Xırdalan şəhəri, Mehdi Hüseynzadə küçəsi, 1 ünvanında bina tikintisi üçün bir qrup şəxsdən pul yığıb, lakin binanı tikməyib. 

Vətəndaşlar bildiriblər ki, Q.Məmmədov onlara hədə-qorxu da gəlməkdən çəkinmir. Şirkət rəhbəri sakinlərə bildirib ki, hara şikayət olunsa da, onu həbs etdirə bilməyəcəklər: “Bizə deyir ki, hara istəyirsiniz şikayət edin. Məni heç kim həbs edə bilməz, guya aldığı pulun əksər hissəsini "yuxarılara" verib və elə buna görə də həbs edilməyəcəyinə əmindir”, - sakinlər qeyd ediblər.

Hüquq müdafiəçisi Ələkbər Məmmədovun bildirdiyinə görə, baş verənlərlə bağlı müxtəlif dövlət orqanlarına, nazirliklərə müraciət etsələr də müsbət cavab ala bilməyiblər. İşlə əlaqədar Baş Prokurorluqda cinayət içi açılsa da Q.Məmmədov yenidən saxta sənədlərlə mənzil satışına davam edib.

Sonda aldadılan payçılar bildiriblər ki, hüquqlarının təmin olunması üçün hər həftənin 3-cü günü Prezident Administrasiyasının  qarşısında aksiya keçirəcəklər. -26C-