102 SC cərimələnib

2012-ci ilin 9 ayında  Qiymətli Kağızlar üzrə Dövlət Komitəsinə səhmdarların hüquqlarının pozulması barədə 174 şikayət ərizəsi və 17 müraciət daxil olub. Onlarda 276 səhmdar cəmiyyətində qanunvericiliyin tələblərinə əməl edilməməsi göstərilir. Şikayətlərin sayı azalsa da, bu, vəziyyətin yaxşılaşması demək deyil. 

QKDK-nın hesabatında deyiilir ki, səhmdar cəmiyyətlərinin 102-sinin fəaliyyətində ciddi qanun pozuntuları aşkar olunub və onlara qarşı 20750 manat məbləğində inzibati cərimələr tətbiq edilib. 127 səhmdar cəmiyyətinə fəaliyyətlərində aşkar edilmiş qanun pozuntularının aradan qaldırılması haqqında icrası məcburi göstərişlər verilib. 

QKDK ölkədə səhmdarların hüquqlarının pozulmasının dinamikasını açıqlamır. Ötən ilki məlumatları təhlil edən Turan müəyyən edib ki, QKDK-ya 454 SC barədə 286 şikayət ünvanlanıb. Səhmdarlar bildirir ki, səhm sahiblərinin hüquqları üzrə vəziyyət pisləşir. Amma hüquqların bərpası üçün onlar məhkəməyə müraciət etməyə üstünlıük verirlər. 

Azərbaycanda səhmdarların hüquqlarının pozulmasına görə maksimal cərimə 300 manatdır. Bütün hallarda QKDK onu günahkar vəzifəli şəxsə yox, hüquqi şəxsə tətbiq edir. Səhmdarlar deyir ki, QKDK-nın bu addımı səhmdarların özünə qarşıdır, çünki SC-nin maliyyə vəziyyətinin pisləşməsi onların dividendinə təsir edir. 

QKDK cərimələri sərtləşdirmək üçün İnzibati Xətalar Məcəlləsinə dəyişikliklər layihəsi hazırlayıb. Amma sənəd 3 il ərzində hökumət dəhlizlərində unudulub. 08B