Mətbuat İcmalı-05.04.13

Qəzetlərin baş məqalələri müxtəlif mövzulara həsr edilib. İqtidar və iqtidaryönlü qəzetlər baş məqalə yerində prezident İlham Əliyevi “The Busines Year” jurnalının ilin adamı elan etməsi, bu jurnala müsahibəsini dərc edib. Müstəqil və müxalifətyönlü qəzetlərin də baş məqalələri fərqlidir.  “Azadlıq” qəzetin baş məqalə kimi The Gardian və dünyanın bir sıra nüfuzlu mediasında dərc edilmiş Əliyevlər ailəsinin gizli biznesi  və ofşor zonalarda qeydiyyatdan keçmiş şirkətləri ilə bağlı araşdırmanı dərc edib. “Bizim Yol” qəzeti “Xarici İllər Nazirliyində qalmaqal” məqaləsini, “Yeni Müsavat” “Milyarderlər İttifaqı ətrafında tufan qopdu” məqaləsini , “Zerkalo”  isə “NATO Azərbaycanla bağlı yeni plan hazırlayır” məqaləsini baş yazı yerində dərc edib. 

“Azadlıq”

  Milli azadlıq hərəkatının liderlərindən olan Nemət Pənahlı xəstə anası ilə görüşmək istəyir. Həbsdə olan Pənahlı görüş üçün Penitensiar Xidmətin rəhbərliyinə müraciət edib. Ötən il Pənahlı atasının yas mərasiminə buraxılmamışdı. 

Prezident Administrasiyasının şöbə müdiri Əli Həsənov deyib ki, qanunları pozan beynəlxalq QHT-lərlə əməkdaşlıq dayandırılacaq. O, bunu Amerikanın Milli Demokratiya İnstitutunun fəaliyyəti ilə bağlı sualın cavabında deyib. 

Rusiya Azərbaycanlılarının Federal Milli Mədəni Muxtariyyətinin (AzərRoss) Ağsaqqallar Şurasının sədri və Rusiya Azərbaycanlıları Təşkilatının rəhbəri Abbas Abbasov bu qurumların adından Azərbaycan rəhbərliyinin əleyhinə yayılan məlumatları təkzib edib. “Mən sədr kimi hər hansı şəxsə təşkilatın adından çıxış etmək tapşırığı verməmişəm”, - qeyd edib.

Qəzet eyni zamanda A.Abbasovun yaxın qohumu Qoca Quliyevin həbs edilməsinin onun Abbasovun qohumu olması ilə əlaqələndirib. Bununla hakimiyyət A.Abbasova mesaj verir. 

Nazirlər, komitə sədrləri, mərkəzi icra hakimiyyətinin təmsilçiləri aprel ayında rayonlarda şikayətçiləri qəbul edəcəklər. Qəzetin yazdığına görə, şikayətçilərin əksəriyyəti icra strukturlarında çalışanlardır. 

Nardaran ağsaqqalları deputat Siyavuş Novruzova cavab veriblər. “Normal seçki olsa Siyavuş Novruzov kimilər parlamentə düşə bilməz”, - kənd ağsaqqalı məşədi Natiq bildirib.          

Güney Azərbaycan Milli Azadlıq Cəbhəsinin sözçüsü, Günaz TV-nin rəhbəri Əhməd Obalı Azərbaycanın ərazi bütövlüyünü təhdid edən İranın “Keyhan” qəzetinə cavab verib: 

“İran keçirilməli olan referendumun yerini səhv salıb. Biz İranda yaşayan azərbaycanlıların bu ölkənin tərkibində qalıb-qalmaması ilə bağlı referendum tələb edirik”. Onun  fikrincə, Güney Azərbaycanın müstəqilliyi üçün tarixi şans yaranıb. 

Amerikada səfərdə olan AXCP sədrinin müavini Fuad Qəhrəmanlı Amerika dövlət katibinin müavinləri, Pentaqonun idarə rəhbəri və “Freedom House”un prezidenti tərəfindən qəbul edilib.   

Rusiyada Avar Milli-Mədəni Muxtariyyəti yaradılıb. Tarixçi Arif Yunus hesab edir ki, bu təşkilatın yaradılması Azərbaycana təzyiq məqsədi daşıyır. 

Yeni yaradılmış “Meydan TV” Türkiyənin “MediaTV”-də yayımlanacaq. Yeni televiziya fəal Emin Milli tərəfindən yaradılıb. Layihənin yaradılmasına sosial şəbəkələrdə tanınan blogerlər Həbib Müntəzir, Kamal Əli də iştirak edir. 

Bu il Azərbaycandan 1400 nəfər Həccə gedəcək. 

“Yeni Müsavat” 

“Guardian” qəzetində Azərbaycan prezidentinin və ailə üzvlərinin biznesi, ofşor zonalardakı şirkətləri ilə bağlı araşdırmaya prezidentin mətbuat xidmətinin rəhbəri Azər Qasımov münasibət bildirib. “Onlar da hər bir Azərbaycan vətəndaşı kimi bizneslə məşğul ola bilər”, - o qeyd edib. 

“Bizim Yol” 

Bakıda şəxsi taksi xidməti çökdürülür. Nəqliyyat Nazirliyinin tətbiq etdiyi qaydalar minlərlə taksi sürücüsü ilan vətəndaşın gəlir əldə etməsinə mane olur. Nazirlik paytaxtın mərkəzi küçələrində yalnız London taksilərinin dayanmasına şərait yaradır. 

Prezidentin yeni tikilən iqamətgahının ətrafındakı daha 5 yaşayış binası sökülür. 

Qəzet “Qərargahsızlaşdırılmış siyasi müxalifət” məqaləsində qərargahları əlindən alınmış müxalifət partiyalarından yazır. 

AXCP sədri hakimiyyətin son durumu ilə bağlı bildirib ki, “hakimiyyət bütün istiqamətlərə xaotik atəş açır. Repressiya maşını heç kimdən yan keçmir”. 

“Polis qaydaları ilə idarə olunan Ağdam” məqaləsində rayondakı mövcud durumdan danışılır. “Rayonda narazılıq tüğyan edir, polis rəisi Nizami Sadıqov problemlərə məhəl qoymur, müxtəlif adlar altında sakinlərin qazancları əlindən alınır. Camaat deputat Bəxtiyar Sadıqovun rayon camaatı ilə görüşmədiyini  deyir”. 

“Bakı xəbər” 

İsmayıllı hadisələri ilə bağlı 200 min manatdan çox ziyan dəyib. İstintaqın keçirdiyi ekspertizanın rəyinə görə 100 min manatdan çox avtomobillərə, 100 manat isə mənzillərə maddi ziyan dəyib. 

Gəncə şəhər Kəpəz Rayon Məhkəməsində “Gündəm xəbər” qəzetinin təsisçisi Şirin Cəfərinin məhkəməsi başlayıb. O, vergi ödəməkdən yayınmada ittiham edilir.