Mətbuat-monitorinq 11.11.15

 Rəsmi qəzetlər dövlət başçısı İlham Əliyevin Milli Elmlər Akademiyasının 70 illik yubileyilə bağlı yığıncaqda iştirak etməsini və çıxışının mətnini ilk səhifələrdə yerləşdiriblər.

“Azadlıq” qəzeti MTN-in keçmiş şefi Eldar Mahmudov və komandasının ələ keçirdiyi 5 ton narkotik maddənin taleyinin aydın olmadığını bildirərək, MTN-in keçmiş rəhbərliyinin açdığı cinayətlərin yenidən araşdırılmasına zərurət yarandığı iddiasını  manjetə çəkib.

Qəzet MTN-in keçmiş idarə rəisi Akif Çovdarovun idarəsindən daha 4 nəfərin həbsə alındığını, bu şəxsin Masazırda ona aid istixanaların birində gizli həbsxanası olduğunu bildirir.

Qəzet Bakı Baş Gömrük İdarəsinin rəisi Vüsal Novruzovun rüşvət tələbilə bağlı 100-lərlə sahibkar tədbir görülməsi üçün dövlət başçısına teleqramlar vurublar.

Qəzet nazir Kəmaləddin Heydərovun İranlı şəriki ilə biznesi, bu biznesin dövlətin diqqətindən kənarda qalması haqda iri həcmli məqalə dərc edib.

Böyük Britaniya dövləti öz vətəndaşları üçün təhlükəli ölkələr sırasında Azərbaycanın da adını çəkir, amma Azərbaycan XİN buna şərh vermir.

İrandakı mənbələr İranın İRİB-2 telekanalında Güney Azərbaycan türklərini təhqirə görə etiraz aksiyalarına qoşulanlara qarşı həbslər başladığını, bununla  belə təhqirə yol verənlər cəzalanana kimi aksiyaların dayanmayacağını bəyan edirlər.

Təcridaxanada saxlanılan AXCP sədrinin müavini Məmməd İbrahimə “hakimiyyət nümayəndəsinə müqavimət” adı ilə yeni ittiham irəli sürülüb, vəkil ittihamı əsassız adlandırıb.

AŞPA Siyasi İşlər komitəsinin Qarabağın azad edilməsi haqda Azərbaycanın xeyinə layihə hazırlamasını  RF XİN başçısı Lavrov AŞPA-nın “səlahiyyət həddini aşması” kimi dəyərləndirir.

Dolların məzənnəsinin getdikcə güclənməsi fonunda ekspertlər Azərbaycanda devalvasiyanın qaçılmazlığına “bütün yollar devalvasiyaya aparır” mövqeyi ifadə edirlər.

Qəzet yazır ki, deputat Vahid Əhmədov reklam biznesinin 89%-nin “kölgə iqtisadiyyatı”nın payına düşməsi bəyanatı səsləndirib.

“Ekspress” qəzeti Qarabağda bir neçə rayonun qaytarılması əvəzində Rsuiyanın Azərbaycanı “Kreml layihəsi” olan Avrasiya İttifaqına üzv etmək barədə erməni mətbuatının mövqeyini “İrəvanda köhnə hay-küy” kimi diqqət mərkəzinə çəkir.

Qəzet MTN-də daha 4 nəfər keçmiş əməkdaşın həbsə alındığını bildirir.

Qəzet 2015-ci ilin 10 ayı ərzində insan alverilə bağlı 103 cinayət faktının qeydə alındığını, 58 nəfərin bu alverin qurbanı olmasının üzə çıxdığını nəzərə çatdırır.

“Novoe Vremya” qəzeti MTN-lə bağlı üzə çıxan cinayətlərə “milli təhlükəsizlik təhlükədədirmi? sualını gündəmə gətirir.

Paytaxt mağazalarındakı araşdırmalara isnadən qəzet real qiymət artımının statistik məlumatları üstələdiyini nəzərə çatdırır.

“Bizim yol” qəzeti “Şəki-İpək” ASC-nin kredit maxinasiyaları ilə çökdürülməsini “Cahangir Hacıyevin 70 milyonluq “barama” əməliyyatı” kimi ilk səhifəyə yerləşdirib.

Dolların məzənnəsinin son 7 ayda ən yüksək həddə çatmasını ekspertlər “ikinci devalvasiya təhlükəsi yaranması” kimi şərh edirlər.

Avstriyada manatın çap olunması ilə bağlı maxinasiyalara görə Avstriya məhkəməsi MTN-in keçmiş şefi E.Mahmudovun məhkəməyə çağırılması ilə bağlı rəsmi Bakıya sorğu göndərib.

“Yeni Müsavat” qəzeti İranın Xəzər dənizində Azərbaycana aid neft-qaz yatağını ələ keçirmək istəməsi haqda iddiasını önə çəkərək, bunu “Bakı və Tehran arasında münaqişə-təhlükəli gəlişmə” kimi dəyərləndirir.

“Karvansaray” ticarət mərkəzini tikən sahibkarlar 8 aylıq təzyiqlərdən sonra mərkəzi MTN-in keçmiş şefi Eldar Mahmudovun qohumu Dilruba İmranovanın adına rəsmiləşdirdiklərini bildiriblər.

MTN ətrafındakı olaylara toxunan politoloq Ərəstun Oruclu törədilən cinayətlərin həcminə adekvat olaraq həbslərin davam edəcəyini bildirib.

Qəzet MTN-in Kadrlar Baş İdarəsinin keçmiş rəisi Əlimusa Əliyevə aid Bakı, Şamaxı, Yardımlı, Qax və Zaqatalada qanunsuz biznes şəbəkəsi aşkar edilib.