Qiymətli kağızlar bazarı iştirakçılarının nizamnamə kapitalının minimum miqdarı müəyyən edilib

Qiymətli Kağızlar üzrə Dövlət Komitəsi  qiymətli kağızlar bazarında lisenziya alan şəxslərin nizamnamə kapitalının minimum miqdarına tələbləri müəyyən edib.

QKDK-nın qərarına əsasən, investisiya şirkətinin, fond birjasının, klirinq təşkilatının və investisiya fondunun depozitarının nizamnamə kapitalının minimum məbləği 1  milyon manat həcmində müəyyən edilir. Əsas investisiya xidmətlərinin göstərilməsi üçün investisiya şirkətinin (A kateqoriya) nizamnamə kapitalının minimum məbləği 300 min manat, yardımçı investisiya xidmətlərinin göstərilməsi üçün (B kateqoriya) 75  min manat  həcmində müəyyən edilir.

İnvestisiya şirkətinin, fond birjasının, klirinq təşkilatının və investisiya fondunun depozitarının nizamnamə kapitalının ödənilməsi yalnız pul vəsaitləri ilə həyata keçirilir.

Amma iyulda “Qiymətli kağızlar bazarı haqqında” qanun qəbul edilənə kimi fəaliyyət göstərmiş şirkətlər vəsaiti əmlak şəklində də qoya bilər. Bu qanuna əsasən, QK bazarının peşəkar iştirakçılarının təşkilati-hüququ forması səhmdar cəmiyyət kimi müəyyən edilib. Bu ilin sonuna kimi MMC kimi təsis edilən şirkətlər SC-yə çevrilməlidir.

QKDK-nın bu qərarı sentyabrda qəbul edilib, hüquqi aktların reyestrində noyabrın əvvəlində açıqlanıb. 08D