Mətbuat-Monitorinq 23.07.14

Rəsmi qəzetlər dövlət başçısı İlham Əliyevin Xızı rayonuna səfəri haqda xəbərlərə geniş yer veriblər. 

“Azadlıq” qəzeti bu günlərdə Azərbaycandan keçərək Gürcüstanda ələ keçən 3 ton heroinin Azərbaycanda hansısa emaldan keçməsinin ehtimal olunması xəbərini manjetə çıxarıb.

Ekspertlər deputat Mübariz Qurbanlının Dini Komitəyə sədr təyin olunmasını PA-nın rəhbəri Ramiz Mehdiyevin Dini Komitəni nəzarətə götürməsi adlandırırlar. 

Hüquq müdafiəçisi Leyla Yunus ifadə vermək üçün prokurorluğa çağırıldığını bildirərək dindirməyə zorla aparıla biləcyini də istisna etməyib.

70 min manat pulunu ala bilməyən “Azadlıq” qəzetinin əməkdaşları “Qasid” yayım firmasının önündə aksiya keçirib, firma rəhbərliyi qəzetə yenə də pulu deyil, onu qaytaracağı barədə vəd verib.

Rusiyalı separatçıların Malayziya təyyarəsini vuraraq 300-ə yaxın insanın ölümünə bais olmasına baxmayaraq, rəsmi Bakının Kremli sərt tənqid edə bilməməsinə ekspertlər “bu rəsmi xarici siyasətin davamıdır” şərhini veriblər.

22 iyul Mətbuat günü ilə bağlı mətbuatın durumunu media təmsilçiləri “medianın iqtidardan asılı olması” kimi dəyərləndiriblər.

Ölkə dindarları Aəzrbaycanda dini azadlıqların olmaması haqda ABŞ Dini Azadlıqlar Komissiyasının hesabatını dəstəklədiklərini bəyan ediblər.

Neft Fondunun gəlirlərin 80%-ni xərclədiyini bəyan edən ekspertlər belə sürətli xərclənmənin vəsaitin tükənməsinə apardığı” barədə xəbərdarlıq edirlər.

“Ekspress”  Brüsseldə Qarabağ danışıqlarının başlayacağı bə həmsədrlərin E.Məmmədyarov və E.Nalbandyanla bir araya gələcəkləri haqda xəbəri ilk səhifəyə çıxarıb.

Qəzet bir neçə gündür ki, Lerik meşələrində başlayan yanğının Hirkan Milli Parkına keçdyini və hələ söndürülmədiyini nəzərə çatdırır.

Qarabağ müharibəsi iştirakçısı Coşqun Nuriyev Xəzər rayonunda  sosial ehtiyac üzündən özünü yandıraraq həyatına son qoyub.

“Exo”  Azərbaycanın daşınmaz əmlak bazarına pul daxil olmalarının artdığını yazaraq faktı “Ukrayna hadisələrinin Azərbaycanın daşınmaz əmlak bazarını əlverişli hala salması” kimi dəyərləndirir. 

“Novoe Vremya”  yüksək faizə banklardan müxtəlif kreditlər götürməklə vətəndaşların banklardan asılı duruma düşməsinə  “kreditlik ömür və ya günü günorta çağı soyğunçuluq” şərhini verir.

Bəzi hakimlərin faktları rədd edərək sifarişli qərar çıxarmalarına qəzet “qiyamət günündə bəzi hakimlər nə cavab verəcəklər?” sualını gündəmə gətirir.

“Bizim yol”  Lerikdəki meşə yanğınını “turbaza” ilə Piran kənd sakinləri arasındakı münaqişənin nəticəsi sayaraq meşənin qəsdən yandırıldığını önə çəkib.

PA ictimai-siyasi şöbəsinin müdiri Əli Həsənov dövlətin 5 ildə mətbuata 17 milyon manat ayırdığı haqda açıqlama verib.

“Yeni Müsavat”  keçən ilin dekabrında həbsə alınan və bu günlərdə azadlığa çıxan general Bəylər Əyyubovun bacısı oğlu Osman İsayevin həbsilə bağlı o zamankı məhkəmə qərarına etirazlarını ilk səhifədə yada salır.

Qəzet tibb akademiyasında regionçuluğun geniş yayılması, rektor Əhliman Əmiraslanovun müəssisədə başqa vəzifələr də tutması, onkologiya və tədris cərrahiyyə klinikasının birbaşa rektorun inhisarında olması haqda yazı dərc edib.

Neft Fondunun bu ilin ilk yarısında qazandığı gəlirlərin 80%-ni xərcləməsini ekspertlər “Fondun gəlirləri “yeməsi”” kimi dəyərləndirirlər.