Mətbuat-Monitorinq 30.04.14

Rəsmi qəzetlər dövlət başçısı İlham Əliyevin Yaponiya Olimpiya Agentiyinin rəhbərini qəbul etməsi, İnzibati Xətalar Məcəlləsinə dəyişikliklərlə bağlı xəbərləri ilk səhifələrə çıxarıblar. 

“Azadlıq” qəzeti tanınmış hüquq müdafiəçisi Leyla Yunusun ofisində və evində aparılan axtarışla bağlı xəbərləri ilk səhifəyə çılxarıb. Qəzet L.Yunusa təzyiqlərlə bağlı ABŞ Dövlət Departamenti və beynəlxalq hüquq-müdafiə təşkilatlarının etiraz bəyanatları ilə çıxış etmələrini nəzərə çatdırır.

Azərbaycanın bir sıra media kapitanları ölkədə söz azadlığına dair açıqlamalarında bu sahədəki durumun “bərbad” halda olduğunu bəyan ediblər.

Qəzetin yazdığına görə, deputat Ceyhun Osmanlı növbəti dəfə MTN-ə aparılıb və onun “nurçu”larla əlaqələri əsas istintaq hədəfi olub.

Qəzet ekspertlərə istinadən əməyin mühafizəsi qaydalarının il ərzində 250 dəfə pozulması nəticəsində 80 nəfərin həyatını itirməsini bəyan edib.

“Zerkalo”  “ermənilərlərlə əlaqələrə” görə tanınmış jurnalist Rauf Mirqədirovun həbsə alınması və  tanınmış hüquq müdafiəçisi L.Yunusun ev və ofisində axtarışların bu həbslə bağlı olmasını ironik “Mirqədirov işi yaşayır” yanaşması ilə anladır.

“Ekspress”  rəsmi Bakının Avropa Birliyindən ədalətli mövqe görməməsi haqda bəyanatını ilk səhifəyə çıxarıb.

Hüquq müdafiəçisi Novella Cəfəroğlu may ayında böyük əfv olacağı və hazırda əfv siyahısı üzərində iş getdiyi haqda açıqlama verib.

Tanınmış ictimai fəal Bəxtiyar Hacıyev Sabunçu Rayon Polis İdarəsinin 13 saylı bölməsində təhqirlərə məruz qalması haqda bəyanat yayıb.

Qəzet mədəniyyət və turizm naziri Əbülfəz Qarayev bərbad binalarda yerləşən kitabxanaların “lazım olmaması və bağlanacağı” haqda verdiyi bəyanatı diqqətə çatdırır.

“Exo” ekspertlərə istinadən ölkədə sığorta ödəmələrinin bütün ÜDM-in cəmi 0,70%-ni təşkil etdiyini yazaraq bunun orta Avropa göstəricilərindən 12 dəfə aşağı olduğunu bildirir.

“Zərflərlə ödəmələr”in heç zaman keçmişə dönməyəcəyini yazan qəzetə görə, özəl sahədə belə ödəmə üsulu sahibkarlara vergidən və sosial ödəmələrdən yayınmaq üçün lazımdır.

“Bizim yol” tanınmış hüquq müdafiəçisi Leyla Yunusun ev və ofisində aparılan yoxlamalarla bağlı xəbərləri ilk səhifəyə çıxarıb.

“Yeni Müsavat”  tanınmış hüquq müdafiəçisi Leyla Yunusun ev və ofisində hüquq-mühfizə əməkdaşlarının axtarış aparmaları haqda xəbərləri manjetə çıxarıb.

Qəzet ölkənin şimalında “rus pasportları” alınması prosesinin genişləndiyi, rus pasportu alanların Azərbaycan vətəndaşlığından çıxmalı olduqları deyilir, rəsmi Bakının bu fakta reaksiya verməməsi qeyd olunur.

Suriyada “cihad” etdiklərini düşünərək Bəşər Əsəd rejiminə qarşı döyüşən Azərbaycandan olan döyüşçülər bu döyüşü məqbul saymayan “ƏbuBəkr məscidi”nin rəhbəri Qamət Süleymanovu “Səudiyyənin agenti” adlandırıblar.