Milli QHT Forumu əlillərin problemləri barədə

Dövlətin əlillərə qayğısına baxmayaraq, bu sahədə həlli tələb olunan problemlər var və vətəndaş cəmiyyət bu kateqoriyadan olan şəxslərin sosial müdafiəsi işinə öz töhfəsini verə bilər. Bu fikir mayın 14-də “Əlillərin və məhdud imkanlı şəxslərin hüquqlarının müdafiəsi və onların cəmiyyətə inteqrasiyası” layihəsinin təqdimatında səslənib. Layihə Əmək və Əhalinin Sosial Müdafiəsi Nazirliyinin dəstəyi ilə Milli QHT forumu tərəfindən həyata keçirilib.

Layihə 2012-ci ilin ikinci yarısında həyata keçirilib. Ölkənin 11 rayonunda vətəndaşların hüquqlarını təmin etməli və onların sosial problemlərini həll etməli olan qurumlarla, İcra Hakimiyyəti, bələdiyyələr, hüquq-mühafizə orqanları, vətəndaş cəmiyyəti və media ilə görüşlər, seminarlar keçirilib.

QHT Forumunun rəhbəri Rauf Zeyni qeyd edib ki, layihədə məqsəd yalnız əlillərin hüquqlarının müdafiəsinə və problemlərinin həllinə yardım göstərmək olmayıb, həm də cəmiyyətdə əlillərə qarşı münasibətin dəyişdirilməsi üzrə maarifləndirmə işi aparmaq olub.

Əlillərlə bağlı yalnış stereotipin aradan qaldırılmalı, onların təhsil, məlumat ala bilmələri üçün maksimal şərait yaradılmalı, işlə təmin olunmalıdır.

Müəyyən edilib ki, əlillər ən çox müavinət və pensiyaların az olmasından, yaşayış şəraitinin pis olmasından, xüsusi nəqliyyat vasitələrinin olmamasından şikayətlənirlər.

Azərbaycan qanunvericiliyində hətta əlillərin diskriminasiyası ilə bağlı hallar var. Bundan əlavə, məmurların laqeydliyi ilə bağlı problemlər də var.

Digər problem isə əlillərin öz hüquqları barədə məlumatlandırılmamasıdır. Psixoloji reabilitasiya mərkəzləri çatışmır. Mövcud nəqliyyat infrastrukturu əlillərin hərəkəti üçün xüsusi yerlər nəzərdə tutmur.

Öz növbəsində nazirliyin sektor rəisi İsgəndər Mustafayev bildirib ki, yeni Şəhərsalma Məcəlləsi əlil arabalarının hərəkəti üçün imkanlar nəzərdə tutur. Bundan əlavə, dövlət hər əlilin fərdi reabilitasiyası proqramını hazırlayır.

Bununla yanaşı perinatal mərkəzlər şəbəkəsinin genişləndirilməsi üzrə tədbirlər nəzərdə tutulub. Məqsəd hamiləliyin ilk həftələrində gələcək körpənin mümkün qüsurlarının proqnozlaşdırılması və öyrənilməsidir.

Nazirliyin nümayəndəsi qeyd edib ki, qanunvericilik yalnız iki halda əlillərlə əmək müqavilələrinin bağlanmasına qadağa qoyur: əgər onların səhhəti konkret işi yerinə yetirməyə imkan vermir və əgər iş onların özlərinin və başqa şəxslərin həyatına təhlükə yaradarsa.

Azərbaycanda əlillərin ümumi sayı 425 min nəfər təşkil edir, o cümlədən 61 min əlil uşaq var.-06C-