Müdafiə Nazirliyi özünü asan zabitə qarşı pis rəftar olması haqqında məlumatı təkzib edib

Müdafiə Nazirliyinin mətbuat xidməti polkovnik-leytenant Natiq Balıyevin guya vəzifəsi kiçildiyi üçün özünü asması haqqında bir sıra KİV-lərin yaydığı məlumatları təkzib edib.

Hərbi idarənin məlumatında deyilir ki, Balıyev ona verilmiş xidməti mənzildə özünü asaraq intihar edib. Məlumata görə, N.Balıyev 12.07.2013-cü il tarixində Müdafiə Nazirliyində yuxarı vəzifəyə təyin olunub, xidməti nəzərə alınaraq ona 11.01.2014-cü ildə növbəti “polkovnik-leytenant” hərbi rütbəsi verilib. Eyni zamanda Polkovnik-leytenant N.Balıyev nazirlik tərəfindən 22.01.2014-cü tarixdə Bakı şəhərində 3 otaqlı xidməti mənzillə təmin edilib.

Bununla əlaqədar olaraq, Müdafiə Nazirliyi bir sıra KİV-lərin HDQ polkovnik-leytenantı Natiq Balıyevin rəhbərliklə münaqişəyə və təqib edildiyinə görə intihar etməsi barədə məlumatlarını təkzib edir, deyə məlumatda bildirilir.

Faktla bağlı Hərbi Prokurorluq tərəfindən araşdırma aparılır. -02D-