![Müəllim azərbaycanlıları ermənilərlə dostluğa çağırdığı üçün işdən qovulub](https://turan.az/resized/750/500/resize/media/2018/main/031300008465.jpg)
Müəllim azərbaycanlıları ermənilərlə dostluğa çağırdığı üçün işdən qovulub
Bakı/13.03.18/Turan: Gənc müəllim Rövşən Əzizov azərbaycanlı və erməni uşaqlar arasında sülh və dostluğa çağırdığına görə işdən çıxarılıb.
Əzizovun Turan-a verdiyi məlumata görə, o, 2004-cü ildən Bakının Nizami rayonunda 220 saylı məktəbdə ingilis dili müəllimi kimi işləyirdi. Bu zaman o, həmişə qeyri-ənənəvi tədris metodlarına üstünlük verir, uşaqların dərslərə marağını artırmaq üçün sənətkarlıq və səhnə tamaşalarından istifadə edirdi.
O, uşaqların iştirakı ilə azərbaycanlılar və ermənilər arasında dostluğa həsr olunmuş bir neçə videoçarx çəkib.
"Mən bir müəllim kimi erməni və azərbaycanlı uşaqların sülh və təhlükəsizlik şəraitində yaşamasını istəyirəm. Heç kim uşaqlar arasında ədavət sala bilməz. Valideynlər uşaqları dostluq və sevgi ruhunda böyütməlidir", deyə Əzizov bildirib.
Videoçarxda şagirdlər əvvəlcə düşmən olan, sonra düşmənçiliyin əbədi sürə bilməyəcəyini anlayaraq, dostlaşan azərbaycanlı və erməni uşaqların rollarını ifa ediblər.
Əzizovun bu ideyası Qarabağ Azadlıq Təşkilatı fəallarının etirazlarına səbəb olub.
"Dekabrın 20-də onlar məktəbə gəliblər və hamının gözü qarşısında məni təhqir ediblər, "satqın" və "erməni casusu" adlandırıblar, işdən çıxarılmağımı tələb ediblər", deyə Əzizov bildirib.
4 gün sonra o, guya əmək intizamını pozduğuna, müntəzəm olaraq işə gecikdiyinə görə məktəbdən qovulub.
Müəllim direktorun əmrindən şikayət verib və martın 14-də Nizami Rayon Məhkəməsində qərar çıxarılması gözlənilir.
"Əslində direktor məhkəmədə mənim dərslərdə "şagirdlər qarşısında ermənilər və azərbaycanlılar arasında sülh haqqında" danışdığıma və məktəbdə onların icazəsi olmadan şagirdlərlə ermənilərlə sülh haqqında videoçarxlar çəkdiyimə görə qovulduğumu etiraf edib.
Videomda onun öz qızının da iştirak etdiyini xatırlatdıqda o, əvvəlcə bunun xalqlar dostluğu haqqında video olduğunu düşündüyünə görə icazə verdiyini, amma ermənilər və azərbaycanlılar arasında sülh haqqında olduğunu öyrəndikdə fikrini dəyişdirdiyini deyib", deyə Əzizov bildirib.
Əzizov qeyd edib ki, valideynlərin heç biri ona irad bildirməyib. Valideynlər və uşaqlar indiyədək onunla əlaqə saxlayırlar. Həmkarlarına gəlincə, onları məhkəməyə Əzizova qarşı müraciəti imzalamağa məcbur ediblər.
"İstəyirəm ki, Ermənistanda da ermənilərin azərbaycanlıların və azərbaycanlıların ermənilərin düşməni olmadığını deməkdən çəkinməsinlər. Təəssüf ki, Ermənistanda azərbaycanlılara qarşı kin yayılır. Bunu deməkdən qorxmamaq lazımdır. Biz qorxsaq, müharibə əbədi olacaq. Mənim fikrimcə, dünyada sərhədlər, düşmənlər olmamalıdır, yalnız sevgi olmalıdır", deyə Əzizov bildirib.
220 saylı məktəbin direktoru Tural Mirzəliyevlə əlaqə saxlamaq mümkün olmayıb.
Direktorun katibəsi hər dəfə onun yerində olmadığını bildirib.
Maraqlıdır ki, hakimiyyətyönlü telekanallarda əvvəllər Əzizovun yenilikçi metodları haqqında süjetlər nümayiş olunurdu. Məsələn, Xəzər TV-nin efirində belə bir süjet yayımlanmışdı. -0-
Cəmiyyət
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
-
İyulun 27-də Bakıda hava dəyişkən olacaq. Abşeronda bəzi yerlərdə yağış yağacaq. Şimal-qərb küləyi əsəcək.
-
Xalq artisti Ağadaş Ağayev Azərbaycan Cinayət Məcəlləsinin 221.3-cü maddəsi ilə silah tətbiq etməklə xuliqanlıqda ittiham olunub.
Rəy yaz