Mühakimə edilmiş Elçin Abdullayevin doğmaları MTN müstəntiqinin özbaşınalığı barədə

2012-ci ildə kibercinayətkarlıq ittihamı ilə həbs edilmiş Elçin Abdullayevin vəkili və doğmaları MTN İstintaq İdarəsinin keçmiş rəis müavini Sahib Ələkbərovun özbaşınalığından və bu qanunsuzluğa göz yuman hakimlərin fəaliyyətsizliyindən şikayətləniblər.

Bugünkü mətbuat konfransında onlar bildiriblər ki, Elçin Abdullayev, Emin Zəkiyev, Rövşən Qəniyev və Mikayıl Dadaşlı 2012-ci ilin fevralında haker yolu ilə bank hesablarından başqalarının pulunu oğurlamaq ittihamı ilə həbs olunublar.

İş 177-ci maddə (oğurluq) üzrə başlanılsa da MTN-in müstəntiqi və onun rəhbərliyi işi araşdırılmaq üçün DİN-ə verməyiblər.

Mühakimə edilənlərin Azərbaycan vətəndaşları olmasına baxmayaraq, onlar “transmilli mütəşəkkil qrup” yaratmaqda ittiham olunublar. ABŞ, Rusiya, Hindistan vətəndaşlarının bu qrupda iştirakı barədə istintaqın məlumatı heç nə ilə təsdiqlənməyib.

Vəkil Süleymanlı bildirib ki, MTN əslində orqtexnika satişı ilə məşğul olan Rəhman Musayevdən pul tələb edib. Ona qarşı mütəşəkkil cinayətkar qrupun yaradılması barədə ittiham irəli sürməkdən ötrü MTN R.Musayevlə əlaqəsi olan sözügedən şəxsləri həbs edib.

R.Musayev cinayətkar qrupun rəhbəri kimi təqdim edilib, lakin sonradan azad edilib. Vəkilin fikrincə, o 300 min manat həcmində rüşvət verib.

Eyni zamanda məhkəmə dörd nəfərin barəsində həbs qətimkan tədbirini dəyişməyib. Yəni, “başçı”nı buraxıblar, qrupun sıravi üzvlərini mühakimə ediblər, vəkil deyib.

“İstintaq bildirib ki, müttəhimlər başqasının pullarını oğurlayıblar, lakin iş üzrə zərərçəkən və pulunun oğurlanmasından şikayət edən yoxdur”, - vəkil qeyd edib.

Eyni zamanda istintaq iki zərərçəkən “tapıb”. Müstəntiq Sahib Ələkbərov Azərbaycan Beynəlxalq Bankının əməkdaşları ilə cinayət sözləşməsinə girərək Elçin Abdullayev və Emin Zəkiyevin bu təşkilata 6180 manat ziyan vurması barədə sənəd alıb və müttəhimlərin ailələrini bu məbləği ödəməyə məcbur edib.

“Bizim tələblərimizə baxmayaraq, Azərbaycan Beynəlxalq Bankı xarici banklardan və ya fiziki şəxslərdən iradlarını təqdim etməyib”, - vəkil bildirib.

İstintaq sübutsuz olaraq E.Abdullayevi 140 min manatın, E.Zəkiyevi isə 40 min manatın mənimsənilməsində ittiham edib və onlar 7 il, 2 ay və 7 il müddətinə azadlıqdan məhrum ediliblər.

Müttəhimlərin qohumları bu ziyanı ödəməyə hazır olduqlarını bildirdikdə müstəntiq pulların ona verilməsini təklif edib. Vəkil təəssüflə qeyd edib ki, üç məhkəmə instansiyası MTN-nin qanunsuz əməlinə göz yumub.

Məhkəmə E.Abdullayevin 2006-cı ildə aldığı evini müsadirə edib, halbuki, o 2010-cu ildə cinayətdə təqsirli bilinib.

Həmçinin E.Abdullayevə məxsus olmayan Toyota Сamry avtomobilinə həbs qoyulub. İstintaq onun ailə üvlərinə təzyiq göstərib.

“8 aylıq hamilə olduğum halda MTN-də həyat yoldaşımın yanında Sahib
Ələkbərov mənə hədə-qorxu gəldi. O, Elçinə dedi ki, əgər etirafedici ifadələr verməsə məni həbs etdirəcək və uşaq valideynsiz böyüyəcək”,- E.Abdullayevin həyat yoldaşı bildirib.

E.Abdullayevin anası, xanımı və vəkili bildiriblər ki,  prezident İlham Əliyevə müraciət edərək təkrar məhkəmə istintaqının keçirilməsi və günahsız mühakimə olunanların reabilitasiyası üçün yardım göstərilməsini xahiş edəcəklər.

Ailə və vəkil Baş Prokurorluğa müraciət edərək MTN-in qanunsuz hərəkətlərinin araşdırılmasını xahiş ediblər.

Vəkil həmçinin bildirib ki, Sahib Ələkbərov hələ Eldar Mahmudov MTN rəhbəri postundan kənarlaşdırılmazdan öncə müstəntiq vəzifəsindən çıxarılıb, indi o, başqa cinayət işi üzrə keçir. 06С-