Mülkiyyət hüquqlarının pozulması adi hala çevrilib

Torpaqların dövlət ehtiyacları üçün azad edilməsi qanun çərçivəsində həyata keçirilməlidir. Bu barədə “Azərbaycanda məcburi köçürmə: hüquqi vəziyyət və beynəlxalq standartlar” mövzusunda keçirilən konfransda bildirib.

Konfrans iştirakçıları vətəndaşların daşınmaz əmlaklarının əllərindən alınması zamanı onların hüquqlarının kütləvi şəkildə pozulması ilə bağlı narahatlıq ifadə ediblər.

Böyük Britaniyanın Azərbaycandakı səfirliyi tərəfindən dəstəklənən layihə çərçivəsində keçirilən tədbirin təşkilatçısı, “İnsan hüquqları üzrə maarifləndirmə” ictimai təşkilatının sədri İradə Cavadova bildirib ki, qanunvericilikdə boşluqlar var, məmurlar bu boşluqlardan istifadə edir, Dövlət Neft Şirkətinin nümayəndələri və digər inhisarçılar isə vətəndaşların əmlaklarının alınmasından söhbət gedərkən ixtiraçı və inadkardırlar.

O, “Suraxanı neft”, “Binəqədi neft”, NEZ-in və bir sıra digər istehsalat sahələrinin ərazilərindən vətəndaşların köçürülməsini nümunə göstərib.

Məsələn, sahibkar Adil Süleymanovun ev tikilməsi üçün icazə, yerli İcra Hakimiyyətinin memarlıq şöbəsi tərəfindən təsdiq edilmiş inşaat planı və qəbalə də daxil olmaqla, bütün sənədləri var. Bununla belə, onu sənədlərin müddətinin keçməsi bəhanəsi ilə evindən çıxarıblar. Dövlət hakimiyyəti orqanı tərəfindən verilmiş sənədin vaxtı necə keçə bilər? - deyə hüquqşünas soruşur. 

Digər bir qanunsuzluq nümunəsi – neft şirkətinin nümayəndəsi bütün sənədlərin qaydasında olduğunu görərək, ev sahibinə deyib ki, peykdən çəkilmiş şəkillərə əsasən, torpaq ona deyil, dövlətə məxsusdur.

Belə cəfəngiyyatlar çoxdur, xüsusən, daşınmaz əmlak tikintisinin qəti qadağan olduğu su borularının, dəmir yollarının, elektrik xətlərinin və digər obyektlərin yaxınlığında. Məsələn, hər dəfə Mingəçevirdə İcra Hakimiyyəti başçısı dəyişdikdə, Kür sahilində gəlirli yerlərin sahiblərinə obyektlərinin söküləcəyi barədə xəbərdarlıq edirlər.

Hüquqşünas Sərvər Süleymanlının sözlərinə görə, Azərbaycan mülkiyyətçilərin hüquqlarını müdafiə edən geniş və etibarlı qanunvericilik bazasına malikdir, lakin məhkəmələr dövlət inhisarçılarından ehtiyatlanır və onların xeyrinə qərarlar qəbul edir. Onun sözlərinə görə, hökumət həmişə sosial ədalətliliyin tərəfdarıdır və ədalətli kompensasiya ödəməyə hazırdır, lakin yerlərdə məmurlar dövlətin xeyrinə torpaqların alınması layihələrindən “yararlanmaq” istəyirlər.

İştirakçıların fikrincə, hüquqi savadsızlığın aradan qaldırılması üçün geniş maarifləndirici proqramlara, məmurlar üçün treninqlərə və televiziya layihələrinə ehtiyac var.

Həmçinin, məmurların hüquqazidd əməlləri üçün meydan yaratmamaq məqsədilə qanunvericilikdəki boşluqları doldurmaq lazımdır. -17D-