Niyə kütləvi zəhərlənmə ilə bağlı rəsmi məlumat yayılmır?

Martın 5-də axşam saatlarında Bakının Lökbatan qəsəbəsində qazdan kütləvi zəhərlənmə olub. Qeyri-rəsmi məlumatlara görə, yüzdən çox insan zəhərlənmə diaqnozu ilə müxtəlif xəstəxanalara çatdırılıb və azı 2 nəfər ölüb.

Maraqlıdır ki, hadisənin baş verməsindən 15 saatdan çox vaxt keçməsinə baxmayaraq, hələ də rəsmi qurumlar baş verənlərlə bağlı rəsmi məlumat yaymayıblar. Nə Fövqəladə, nə Səhiyyə nazirlikləri, nə də Dövlət Neft Şirkətinin rəsmi saytlarında məlumat yoxdur. Nə də bu qurumların mətbuat xidmətləri rəsmi məlumat yaymayıblar.

Respublika Prokurorluğunun mətbuat xidmətindən Turan-a bildirilib ki, hazırda  müstəntiqlər hadisə ilə bağlı araşdırma aparırlar. Yaxın saatlarda prokurorluq rəsmi məlumat yayacaq.

Səhiyyə Nazirliyinin mətbuat xidməti də yaxın saatlarda məlumatın yayılacağını bildirib.

Bakı Təcili və Təxirəsalınmaz  Tibbi Yardım Stansiyasından məlumat verməkdən imtina edərək və bildiriblər ki, Səhiyyə Nazirliyi məlumat yayacaq.

Respublika Toksikoloğiya Mərkəzindən Turan-a bildirilib  ki, mərkəzə Lökbatan qəsəbəsindən qazdan zəhərlənmə ilə 43 xəstə daxil olub. Onların hamısına tibbi yardım gəstərilib və evlərinə buraxılıb.

İlkin məlumata görə, zəhərlənmə təbii qaza vurulan odorant maddəsinin normadan çox olması səbəbindən baş verib.-03B-.