Novruzəli Məmmədov haqqında film ekrana çıxır

Bakı/09.03.18/Turan: Novruzəli Məmmədov haqqında çəkilən "Bir ailənin faciəsi" filmi Niderland Krallığının Rotterdam şəhərində KIFF Beynəlxaq Film Festivalında nümayiş olunacaq. Film İsveçrədə mühacir həyatı yaşayan rejissor-dokumentalist Laçın Məmişov tərəfindən lentə alınıb.

Bu barədə filmin müəllifi Laçın Məmişov Turan İN-nə xəbər verib.

"Müəllif bildirir ki, bu "Mühacirlər" layihəsi çərçivəsində çəkilən dördüncü filmdir və 2018-ci ilin yanvar ayında tamamlanıb. KIFF Beynəlxalq Film Festivalında filmin ilk premyerası olacaq. Bundan əlavə film bir neçə beynəlxalq film festivallarına təqdim olunub və müsbət cavab alınıb. Filmin ümumi xronometrajı 50 dəqiqədir və hələlik ingilis dilinə tərcümə olunub. Yaxın zamanlarda filmin rus və alman dillərinə də tərcümə olunması nəzərdə tutulub".

"Tolışi Sedo" qəzetinin təsisçisi və baş redaktoru, "Talış Mədəniyyət Mərkəzi"nin rəhbəri, mərhum professor Novruzəli Məmmədov 2007-ci ildə həbs olunmuşdu və həbsxanada müəmmalı şəkildə dünyasını dəyişmişdi. N.Məmmədovun oğlu Kamran atası həbsdə olduğu zaman naməlum şəxslər tərəfindən vəhçicəsinə döyülmüşdü. Növbəti gün Kamran Məmmədov dünyasını dəyişmişdi. Ailənin ikinci oğlu Emil Məmmədov atasının 40 mərasimindən Bakıya qayıdarkən Novruzəli Məmmədovun xanımı Məryəm Məmmədova ilə birlikdə avtoqəzaya düşmüşdü. Bakı-Astara yolunda qarşı tərəfdən gələn ağır tonajlı yük maşını Emil Məmmədovun idarə etdiyi avtomobilə çırpılmışdı. Nəticədə Emil Məmmədov və Məryəm Məmmədova ağır xəsarətlər alaraq xəstəxanaya yerləşdirilmişdi. Bir müddət sonra Emil Məmmədov Moskvada müalicə üçün aparıldı və xəstəxanada dünyasını dəyişdi. Ailənin yeganə sağ qalan üzvü, Novruzəli Məmmədovun xanımı Məryəm Məmmədova ölkəni tərk edərək Niderland Krallığında siyasi sığınacaq almaq məcburiyyətində qaldı. Hal-hazırda Niderland Krallığının Haaqa şəhərində yaşayır.

Müəllif bildirir ki, filmin çəkilişi haqqında məlumat ilk dəfə yayılanda ölkə ictimaəti tərəfindən birmənalı qarşılanmadığı kimi, film də birmənalı qarşılanmayacaq.

"Bizim ölkədə qəribə yanaşma var. Bəzi "millətçilər"deyir ki, "niyə Novruzəli Məmmədov haqqında film çəkirsən?" - Yəni TMR (Talış Muğan Respublikası) məsələsinə eyham vururlar. Bəzi "ura patriot" talışlar da deyir ki, "bizim hüquqlarımızı pozurlar, diskriminasiyaya məruz qalırıq". Amma hamısı əsas problemi anlamırlar ki, Azərbaycancanda TMR problemi talışlardan çox hakimiyyətə lazım idi və ümumiyyətlə Novruzəli Məmmmədovun TMR məsələsinə heç bir aidiyyatı olmayıb. Əksinə Novruzəli Məmmədov hakimiyyətə həmişə loyal münasibət bəsləyib. Onun rəhbərlik etdiyi "Talış Mədəniyyət Mərkəzi" Heydər Əliyevin şəxsi göstərişi ilə yaradılıb. O ki, qaldı hüquqların pozulması və ya diskrimminasiyan məsələsinə, Azərbaycanda vətəndaşların hüququ milli kimliyinə görə yox, ümumiyyətlə vətəndaşların heç bir hüququ olmadığı üçün pozulur. Konstitusiyanın 1-ci maddəsi sadəcə dekorosiya üçündür".

Laçın Məmişov qeyd edib ki, "Mühacirlər" layihəsi çərçivəsində çəkilən hər filmi öz peşə fəaliyyətini yerinə yetirərkən həlak olan jurnalistlərin xatirəsinə həsr edib. "Layihənin ilk filmini Elmar Hüseynovun, ikinci II hissəli "Kəlbəcər düyünü" və Böyük Oyun" filmləri Milli qəhrəman Çingiz Mustafayevin və ən nəhayəti "Bir ailənin faciəsi" filmi isə Milli qəhrəman Salatın Əsgərovanın xatirəsinə həsr etmişəm. Əsas məqsədim odur ki, bu insanlar unudulmasın. İstər istəməz filmlər həsr olunduqları insanlar haqqında məlumatı olmayan tamaşaçıda sual yaradır və həmin insanların bioqrafiyası ilə maraqlanırlar. Bundan sonra çəkəcəyim bütün filmləri əsasən Avropa və Qərb auditoriyası üçün çəkməyi nəzərdə tutmuşam. Filmləri ingilis və alman dillərində işləyəcəm. Çünki özümüz deyib, özümüz eşitməyin bir mənası yoxdur. Azərbaycanın acı həqiqətlərini dünyaya göstərmək önəmlidir".