Ölkə mediası nə yazır? Media-icmal 29.12.20

"Azərbaycan" qəzeti  "Müsbət dinamika arxayınlıq yaratmamalıdır" sərlövhəli məqalədə COVİD-19 pandemiyası ilə bağlı Azərbaycandakı vəziyyəti dəyərləndirir. 

Müəllif deyir ki, artıq bir ildir ki, koronavirus infeksiyası bütün dünyada tüğyan edir, amma hələ ki, qarşısını almaq mümkün olmayıb. Bu bir ildə planetin 213 ölkə və bölgəsinə yayılan koronavirusa yoluxanların ümumi sayı 81 milyon nəfəri ötüb, vəfat edənlərin sayı isə 2 milyona yaxınlaşır.

Müəllif deyir ki, dünya ölkələri vətəndaşlarını bu virusdan qorumaq üçün hazırda pandemiyaya qarşı ən effektiv vasitə olan karantin rejiminin tətbiqini həyata keçirməyi üstün tuturlar və Azərbaycan da bu üsulu tətbiq edən ölkələr sırasındadır.

Müəllifə görə, Azərbaycan təşkilati məsələlərdən tibbi prosedurlara kimi qabaqlayıcı tədbirlər həyata keçirməyə başladı, sərhədlər qapadıldı, kütləvi toplantılar, toy şənlikləri və yas mərasimləri qadağan edildi, sosial izolyasiya qaydaları tətbiq olundu.

Son aylar koronavirusa yoluxma hallarının kəskin artması ilə əlaqədar Nazirlər Kabineti yanında Operativ Qərargah ölkə üzrə xüsusi karantin rejimini yanvarın 31-dək uzadıb: "Tətbiq edilən karantin rejimi və digər koronavirusla mübarizə tədbirlərinin səmərəliliyi sayəsində son günlər ölkəmizdə yoluxma hallarında azalma müşahidə olunmaqdadır", deyə müəllif bildirir.

Məqalədə vurğulanır ki, müsbət dinamika vətəndaşları koronavirusla mübarizədən çəkindirməməli, maska taxılması, sosial məsafə gözlənilməsi, gigiyena qaydalarına əməl olunması tələblərinə ciddi əməl 0lunmalıdır.

"Redaktor.az" saytında  "COVID-19: Azərbaycanda real yoluxma daha çoxdur – Vaksin vurulmasa... açıqlama" sərlövhəli məqalədə COVİD-19 pandemiyası ilə bağlı Azərbaycandakı vəziyyət dəyərləndirilir.

Pandemiya ilə bağlı duruma şərh verən professor Adil Qeybulla deyir ki, xəstə sayı ilə bağlı statistika reallığı əks etdirmir, belə ki, qeydiyyata düşməyən, evdə özü müalicə alan yüzlərlə xəstə var: "Onlar arasında ölüm halları faktlarını bilmirik. Ölüm sayının 40 rəqəmindən düşməməsi onu göstərir ki, xəstəliyin yumşaldılması hələ müşahidə edilmir", deyə professor bildirir.

A.Qeybulla hesab edir ki, virusa yoluxma zəncirini qırmaq sahəsində vaksinlərin önəmi ox böyükdür, amma bu, heç də bütünlükdə pandemiyanın sonu anlamına gəlmir: "Onlar müəyyən müddət təsir göstərirlər. Vaksin vurulduqdan  təxminən 42 gün sonra immunitet formalaşır. Bədənə kifayət qədər antikor yığmaq üçün 2-ci vaksinasiyaya da ehtiyac ola bilər".

Professora görə, tamamilə vaksinlərə arxalanmaq, müəyyən tədbirləri görməkdən çəkinmək düzgün deyil, karantin qaydalarına ciddi riayət etmək lazımdır".

"Azpolitika.info" saytında "Səhiyyə Nazirliyinin və TƏBİB-in timsalında ikibaşlı piramida yaranıb. Ölümlərin xeyli hissəsi onunla bağlıdır ki..." sərlövhəli məqalədə ölkənin səhiyyə sistemindəki idarəetmə və onun nəticələri dəyərləndirilir.

Deputat Əli Məsimli ölkənin səhiyyə sistemindəki idarəetmənin effektiv olub-olmamasını dəyərləndirir.

Müəllif deyir ki, ölkədə koronavirus infeksiyasına yoluxma sayı azalsa da pandemiyaya qarşı mübarizə ciddi tənqidlərə məruz qalır. Müəllifə görə, bu tənqidlərə səbəb isə koronavirus xəstələrinə lazım olan dərmanların əldə oluna bilməməsi, xəstələri xəstəxanalara yerləşdirmək sahəsində problemlər yaşanması, dərman bazarında süni qıtlıq yaradılmasıdır.  

Ə.Məsimli hesab edir ki, pandemiyaya qarı mübarizə effektiv qurulmayıb.

"Bu ilin ikinci yarısında ölənlərin sayı iki min nəfəri keçib. Halbuki, ilin ilk yarısında bu itki 200 nəfər idi. Deməli ölüm halı 10 dəfədən çox artıb", deyə o, fikrini əsaslandırır.

Deputata görə, bu sahədə uğur qazana bilmək üçün təşkilati sahədə mövcud olan məsələlər həllini tapmalıdır: "Problem isə ondan ibarətdir ki, TƏBİB və Səhiyyə Nazirliyi nümunəsində ikibaşlı piramida yaranıb. Bu ikibaşlı piramidanın koordinasiyası effektiv olsa uğurlu nəticələr əldə edəcəyik. Əksinə, olmayacaqsa işin effektivliyi aşağı düşəcək.    

Daha bir problem evdə müalicə alan koronavirus xəstələrinin dərman komplektlərilə pulsuz təmin edilməməsidir, bəzi hallarda isə pulsuz verilməli olan dərmanlar hansısa kanallar hesabına apteklərdə satılır.

Deputats görə, daha bir problem dərman çatışmazlığıdır, ola bilər ki, xəstəxanalar belə problem yaşamır, amma evlərdə müalicə alanlar dərman çatışmazlığı üzündən dünyalarını dəyişirlər.

Deputat deyib ki, koronavirusla bağlı test 100-130 manat təşkil edir, halbuki 20-23 manat təşkil edən ekspress-test əhali üçün əlçatandır.

"Həqiqətən də süni şəkildə qıtlıq yaradılması, dərmanların baha qiymətə satılması, bundan qazanc götürülməsi qəbul edilən hal deyil və bu, ən azı mənəvi baxımdan insan həyatına qəsd kimi qiymətləndirilməlidir", deyə deputat vurğulayıb..

"Bizimyolinfo.az" saytında "Qarabağda terror: Rusiya Azərbaycana təzyiq edir – politoloq" sərlövhəli məqalədə müəllif Qarabağda erməni yaraqlılarının terror əməllərini gündəmin müzakirəsinə daşıyır.   

Yeri gəlmişkən, belə terror hadisələrindən biri dekabrın 27-də Xocavənd rayonunda törədilib, bunun da nəticəsində Azərbaycan Ordusnun bir əsgəri şəhid olub, biri yaralanıb, 6 erməni terrorçu isə öldürülüb. 

Politoloq Nəzakət Məmmədova deyir ki, Rusiyanın Qarabağda bir ovuc erməni terrorçusunun öhdəsindən gələ bilməməsini düşünmək belə sadəlövhlükdür. 

Politoloqa görə, bunun arxasında hansısa mətləb var, daha çox Rusiyanın Prezident İlham Əliyevlə Ermənistan Baş naziri Paşinyanın yanvarda nəzərdə tutulan görüşü öncəsi vəziyyətin gərginləşməsinə şərait yaratmaq və xüsusən Azərbaycana təzyiq göstərib istədiyi sülh sazişi müddəalarını imzalatmaqdır.

Digər tərəfdən, proseslər Azərbaycan ərazilərində baş verir, odur ki, Rusiya əsas söz sahibi olan Azərbaycana təzyiq göstərmək istəyir.

Politoloq hesab edir ki, Azərbaycan üçün ən qorxulusu gələcəkdə Rusiyanın hərbi baza yaratması, Qarabağ əhalisinə aralıq statusu məsələsinin gündəmə çıxarılması, Azərbaycanın Avrasiya İqtisadi Birliyinə və Kollektiv Təhlükəsizlik Müqaviləsi Təşkilatına üzvlüyünün müzakirə olunması ola bilər.

"Müsavat.com" saytı isə "Erməni terrorizmi real təhlükəyə çevrilir: Rəsmi Bakı Xankəndidə antiterror əməliyyatlarına qərar verə bilər" sərlövhəli məqalədə Qarabağda erməni terrorunu dayandırmaq məsələlərini müzakirəyə çıxarır.

Müəllifə görə, Ermənistanın terrora əl atması biabırçı hərbi məğlubiyyətin nəticələrini total terrorçuluq fəaliyyəti ilə aradan qaldırmaq cəhdidir.

Müəllifə görə, Azərbaycan Qarabağda antiterror əməliyyatlarını Rusiya sülhməramlı qüvvələrinin iştirakı ilə ortaq şəkildə Xankəndi və bu şəhərin ətrafında da apara bilər.

Müəllif deyir ki, teror çıxış yolu deyil, Ermənistan Azərbaycan və Türkiyə ilə münasibətləri yaxşılaşdırmalı, ya da çantalarını yığaraq yaşadıqları Cənubi Qafqaz məkanını tərk etməlidir. Müəllifə görə, erməni radikalların mövcudluğu tarixi düşmənçilik meyllərinin dərinləşməsindən qaynaqlanır.

Müəllif vurğulayır ki, rəsmi Bakının belə terror aktlarına uzun müddət səbrli yanaşacağı qətiyyən inandırıcı görünmür, çünki, bu terror hadisələri məhz Azərbaycan ərazisində törədilməkdədir: "Rəsmi Bakı isə Azərbaycan ərazilərində dinc inkişaf prosesində, sabitlik şərtlərinin hökm sürməsində birbaşa maraqlıdır. Və erməni terrorçuların sabitliyi pozmasına qətiyyən imkan verməz", deyə müəllif bildirir. Deməli, tezliklə Azərbaycanın daha radikal addımlar atması istisna deyil. Odur ki, rəsmi Bakı Azərbaycanın Xankəndi də daxil olmaqla, işğaldan azad olunmuş bütün ərazilərində genişmiqyaslı antiterror əməliyyatlarına başlamaq qərarı verə bilər.