Ombudsmanın nümayəndələri İlham Əmiraslanova baş çəkəcəklərini vəd ediblər

 Ombudsman aparatının nümayəndələri bu gün Sabirabad rayonu Əsgərbəyli kənd sakini, vətəndaş fəalı, odlu silah saxlamaq ittihamı ilə həbs olunan İlham Əmiraslanova baş çəkməyi vəd ediblər.  

    İ.Əmiraslanovla görüşün vacibliyi barədə məlumat ombudsman aparatına iyunun 18-də Turan İnformasiya Agentliyinin direktoru Mehman Əliyev və “Kür” Vətəndaş Cəmiyyəti Qərargahının  koordinatoru Oqtay Gülalıyevin adından daxil olub. Lakin indiyədək ombudsmanın nümayəndələri Kürdəxanı təcridxanasında İ.Əmiraslanova baş çəkməyə vaxt tapmayıblar.

     Ombudsman aparatının “qaynar xətt”indən bunu beynəlxalq konfransla əlaqədar məşğulluq ilə izah ediblər.  

    İ.Əmiraslanov iki ildir ki, 2010-cu ilin sel daşqınlarından zərər çəkənləri fəal müdafiə edib. O, FHN rəhbəri Kəmaləddin Heydərovla görüşündən üç gün sonra, iyunun 8-də  həbs olunub.

    Nazir zərərçəkənlərin həll olunmamış problemləri ilə məşğul olacağını vəd edib, lakin bunun əvəzində vətəndaş fəalını həbs ediblər, yerli sakinlərə daha çox təzyiq göstərməyə başlayıblar, onları hökumətə qarşı iradlarından imtina etməyə məcbur ediblər.

    İ.Əmiraslanovun həbsi milli və beynəlxalq qanunvericiliyin pozulması ilə müşayiət olunub. O, istintaq təcridxanasından respublika prokurorluğuna məktub göndərərək polisdə ona məxsus olmayan tapança və patronları saxlamasını etira etməsi məqsədilə işğəncə verildiyini bildirib.  

    İ.Əmiraslanov saxta ittihamla həbs olunmuş “Kür” qərargahının koordinatoru Oqtay Gülalıyev azad edildikdən 4 gün əvvəl tutulub. O.Gülalıyev də həbsdən sonra işgəncələeə məruz qaldığını bildirib.

    “Kür” qərargahı 2010-cu ilin daşqınlarından zərər çəkənlərin hüquqlarının müdafiəsi məqsədilə qeyri-hökumət təşkilatları tərəfindən yaradılıb.—0—