Hakimiyyət alternativ Kinematoqrafçılar İttifaqı yaradır

 Bu gün “Nizami” kinoteatrında kinematoqrafçılar qrupunun təsisat iclası keçirilib. Onlar Azərbaycan Kinematoqrafçılar İttifaqının yaradıldığını elan ediblər. İclasda aktrisa Şəfiqə Məmmədova İttifaqın sədri seçilib.

    İdarə Heyətinin üzvləri ssenariçi Ayaz Salayev, “Mədəniyyət” telekanalının direktoru Cəmil Quliyev, “Space” telekanalının direktoru Vaqif Mustafayev, rejissor Oqtay Mirqasımov, ssenariçi Ramiz Fətəliyev, rəssamlar Mais Ağabəyov və Yusif Quliyev, bəstəkar Siyavuş Kərimi, “Azərbaycanfilm” kinostudiyasının direktoru Müşfiq Hətəmov, “Nərimanfilm” kinostudiyasının direktoru Nəriman Məmmədov olub.

    Maraqlıdır ki, Azərbaycanda Kinematoqrafçılar İttifaqı on illərdir mövcuddur və analoji adlı daha bir təşkilat necə yaradıldığı aydın deyil, çünki bu, hüquqi cəhətdən nonsensdir.

    “Yeni” strukturun təsis edilməsi sirr pərdəsinə bürünmüşdü. Mətbuat iclasa dəvət edilməmişdi, əvəzində baş nazirin müavini Elçin Əfəndiyev və mədəniyyət naziri Əbülfəz Qarayevin şəxsində hakimiyyət tədbirdə iştirak edib. 

    Tədbirdə Vaqif Mustafayev Rüstəm İbrahimbəyovun rəhbərlik etdiyi Kinematoqrafçılar İttifaqını tənqid edib və alternativ qurumun yaradılması zərurətini əsaslandırıb.

    Turan agentliyi tədbir iştirakçılarından biri olan rejissor Oqtay Mirqasımova müraciət edərək, məsələni aydınlaşdırmağı xahiş edib. Cabada rejissor bildirib ki, telefonla şərh verə bilməz və daha sonra məlumat verəcək. Eyni zamanda, yeni qurumun yaradılmasına haqq verib və böhran vəziyyətində olan kinematoqrafda irəliləyişlər olacağına ümidini ifadə edib.

    Tədbirin digər iştirakçısı, Ayaz Salayev Turana bildirib ki, bu yığıncağın təşəbbüskarı olmayıb. “Məni dəvət etdilər və mən də getdim, çünki yeni ittifaqın Azərbaycan kinematoqrafına inkişaf qazandıracağına ümid edirəm”, deyə o bildirib.

    Ümidlərinin nə ilə bağlı olması və hökumətin yeni İttifaqa dəstək vəd edib-etməməsi barədə suala cavabda o, “dövlət dəstəyinə şad olduğunu” bildirib.

    Kino da daxil olmaqla, mədəniyyət sahəsinin dövlətin dəstəyinə ehtiyacı var, çünki bu sahədə “sıfırdan məhsul yaratmaq” çox çətindir.

    “Yeni qurum yaradırsa, zal insanlarla dolursa, deməli, onların ümidinin real zəmini var”, deyə Salayev əlavə edib.

    İclasda hər kəsdən daha fəal çıxış edən Space telekanalının rəhbəri, kinorejissor Vaqif Mustafayevlə əlaqə saxlamaq mümkün olmayıb. 

    Öz növbəsində, “köhnə” Kinematoqrafçılar İttifaqının sədri, məşhur dramaturq Rüstəm İbrahimbəyov Turanın müxbiri ilə söhbətində baş verənlərdən təəccübünü ifadə edib.

    “Bir ittifaqın mövcud olduğu halda ikincisinin yaradılması məqsədəuyğun deyil. Bundan başqa, yaradıcılıq ittifaqının təsis edilməsində hökumət üzvləri iştirak ediblər ki, bu da hakimiyyətin bu işdə əli olduğunu göstərir”, deyə o qeyd edib.

    Yeni İttifaqın onun təşkilatına qarşı yaradılıb-yaradılmaması barədə suala cavabda dramaturq bunu istisna etmədiyini deyib. Eyni zamanda, o qeyd edib ki, hər şey yaratmaq olar. Bu deyil, məqsədlər vacibdir. “Bu kinematoqrafın inkişafına səbəb olarsa, biz yalnız şad olarıq”, deyə o bildirib. “Vaxtilə bizim kinematoqrafçılar məktəbi yaratmağımıza, festival keçirməyimizə və digər təşəbbüslərimizə mane oldular. Onlar bütün bunları edəcəklərsə, Allah xatirinə, etsinlər”, deyə İbrahimbəyov qeyd edib.

    İttifaqdan həmkarlarının – Oqtay Mirqasımovun, Ayaz Salayevin və bir sıra digərlərinin yeni quruma keçməsini necə qiymətləndirməsi barədə suala cavabda İbrahimbəyov deyib ki, hər kəs seçim etməkdə azaddır. “Bu, hüquq məsələsi deyil, vicdan məsələsidir. Düzünü desəm, onların bu hərəkətlərindən təəccübləndim. Vaqif Mustafayevə gəlincə, təəccüblənmirəm. 10 il əvvəl biz onu qeyri-etik davranışına görə İttifaqdan çıxardıq”, deyə İbrahimbəyov qeyd edib.

    İttifaqın adının açıqlanmasını istəməyən daha bir üzvü Turana bildirib ki, tədbir gizli və ciddi pozuntularla keçirilib. Belə ki, bir çox kinematoqrafçılara və İttifaqın üzvlərinə bu tədbir barədə məlumat verilməyib. Toplantının statusu da aydın deyil. “Onların Nizamnaməsi, Əsasnaməsi haradadır, necə eyni adlı yaradıcılıq təşkilatı yaratmaq olar?”, deyə o bildirib.

    “Bundan başqa, yeni İttifaqdakı bir neçə nəfər köhnə İttifaqın üzvləridir, Şəfiqə Məmmədova isə İttifaqın katibidir. Bütün bunlar necə bir araya sığacaq?”, deyə o, qəzəbini bildirib.

    Qeyd edək ki, Rüstəm İbrahimbəyovun təşkilatı uzun illərdir müstəqil mövqeyi və hakimiyyətin mədəniyyət sahəsində siyasətini tənqid etdiyi üçün hakimiyyətin təzyiqlərinə məruz qalır. Bundan başqa, İbrahimbəyov rəhbərliyin ideologiya və ictimai həyat sahəsində fəaliyyətini şübhə altına alan Ziyalılar Forumunun fəal üzvüdür. -02B06-