Prokurorluq diaqnozu dəqiqləşdirir

Baş Prokurorluq hüquq müdafiəçisi  İlham Əmiraslanovun polis əməkdaşları tərəfindən döyülməsi nəticəsində qulaq pərdəsinin deşilməsi və həmin xüsusatın Penitensiar Xidmətin Müalicə müəssisəsinin həkimi tərəfindən təsdiq edilməsi xəbərini təkzib edir.

Baş Prokurorluğun mətbuat xidmətindən Turana verilən məlumata görə, Komisyon məhkəmə-tibbi ekspertizası ilə həmçinin müəyyən edilmişdir ki,  Penitensiar Xidmətinin Müalicə Müəssisəsinin həkimi tərəfindən 11 iyul 2012-ci il tarixdə İ.Əmiraslanovda aşkar edilmiş "sol qulaq pərdəsinin nöqtəvari quru perforasiyası (deşilməsi)" xroniki gedişli qeyri-travmatik mənşəli otitdən sonrakı prosesin nəticəsi olmaqla uşaq yaşlarında və 8 iyun 2012-ci il tarixdən əvvəlki dövrlərdə əmələ gəlmiş və qeyri-travmatik mənşəli olduğundan sağlamlığa zərər vurmanın dərəcəsinin təyinində nəzərə alınmır.

Turan Agentliyinin  əldə etdiyi   11.07.12 (№17/38-5329),tarixli  tibbi ekspertizası nəticəsi ancaq bunu qeyd edir: "Həkim-otorinolarinqoloq tərəfindən  müayinə olunaraq təqsirləndirilən şəxs  İlham Əmiraslanova "sol qulağın təbil pərdəsinin quru perforasiyası "diaqnozu  təyin edilib".

     Lakin prokurorluğun iddia elədiyi kimi həmin  ekspertiza rəyində perforasiyanın səbəbləri haqqında heç bir məlumat verilmir.

    Əmiraslanovun qardaşı Xəlil Turana bildirib ki, İlham heç bir zaman  qulaq xəstəliyi  keçirməyib  və iyunun  8-dək qulaq ağrılarından şikayət etməyib.

     Xatırladaq ki, Əmiraslanov iyunun 8-də – 2010-cu il daşqınında ziyan çəkmişlərin problemlərinin həlli ilə bağlı FHN rəhbəri Kəmaləddin Heydərovla görüşündən 4 gün sonra həbs edilib.

    Həbs üçün Əmiraslanovun evində silah tapılması əsas olub. Həbsdən sonra hüquq müdafiəçisi döyülüb və etirafedici ifadələr vermək məcburiyyətində qalıb. Lakin sonradan o, işgəncə altında ifadə verməyə məcbur olduğunu bildirib.

    Əmiraslanov daşqından ziyan çəkənlərin hüquqlarını müdafiə edən və korrupsiyaya qarşı mübarizə aparan “Kür” vətəndaş cəmiyyəti qərargahının fəallarından biridir. -16D-