Qafqaz Müsəlmanları İdarəsi Qazılar Şurası Qurban Bayramı münasibətilə fətva verib

Bakı/22.06.23/Turan: İyunun 22-də Qafqaz Müsəlmanları İdarəsi Qazılar Şurası Qurban bayramı münasibətilə  fətva verib.  Fətvada  bu il Qurban bayramının Zilhiccə ayının 10-na,  miladi tarixlə iyunun 28-nə təsadüf edəcəyi bildirilir.

Həmin tarixdən Qurban bayramı ilə bağlı kəsimlər 3 gün davam edə bilər. İyun ayının 28-də ölkə məscidlərində bayram namazı qılınacaq.

Qurban bayramına dair hökmlərə və şəriət qaydalarına əsasən qurban kəsmək Həcc ziyarətini icra edən zəvvarlar üçün vacibdir. Bundan kənarda isə maddi imkanı olan adamların qurban kəsməsi bəyənilən əməl sayılır.  

Şəriət qaydalarına görə, qurban kəsilən heyvan sağlam və kəsimə yararlı olmalı, xəstə və qüsurlu olmamalıdır. Qurbanlıq üçün müəyyən yaş həddinə çatmış heyvanlar kəsilir. Keçi və qoyunun yaşı bir ilə yaxın, öküz və inək iki ildən artıq, dəvənin isə beş ili tamam olmalıdır.

Qafqaz Müsəlmanları İdarəsi və Qazılar Şurası müqəddəs Qurban bayramı münasibətilə dünya müsəlmanlarını və Azərbaycan xalqını təbrik edir, Allah, vətən və zəfər uğrunda canlarını qurban edən şəhidlərə rəhmət, qazilərə şəfa arzulayır. -0-