Qəzet redaktorunun müavinini hədələyirlər

Sumqayıtda dərc olunan “Yüksəliş naminə” qəzetinin redaksiyası yerli hakimiyyət orqanlarının və polisin nəşrin redaktor müavini Elçin Həsənova qarşı təzyiq göstərdiyini bildirir.

Qəzetin bəyanatında deyilir ki, o, dəfələrlə polis tərəfindən saxlanılıb, məhkəməyə aparılıb, cərimə edilib və həbs olunub.

Hər dəfə vətəndaşların kütləvi aksiyaları zamanı polis onun evini nəzarətə alır, qonşularını və doğmalarını narahat edir.

Bundan başqa, Həsənov daim izlənir, ünvanına fikrindən dönməsə həbs ediləcəyi barədə hədələr səslənir.

Son özbaşınalıq hadisəsi 22 aprel saat 15.00-da baş verib. Həsənov mülki geyimli şəxslər tərəfindən saxlanılıb və 1 saylı Sumqayıt polis şöbəsinə aparılıb.

O, vəkilin iştirakı olmadan dindirilib, polis əməkdaşları onun onların vəsiqələrini cırdığı və ictimai asayişi pozduğu barədə yalan ifadələr veriblər.

Həsənovla kobud davranıblar, evə zəng etməsinə imkan verməyiblər və telefonunu əlindən alıblar.

Bəyanatda deyilir ki, Həsənovun saxlanılmasına səbəb onun Sumqayıt rəhbərliyi haqqında tənqidi məqalələri və sosial şəbəkələrdə nəşrləri olub.

Həsənov məhkəməyə aparılıb və vəkilsiz 100 manat cərimə edilib. Bundan sonra onu yenidən polisə qaytarıblar və psixoloji təzyiq göstərərək, şəhər hakimiyyəti haqqında tənqidi nəşrlərə son qoymasa, daha ciddi tədbirlər görüləcəyi ilə hədələyiblər.

Redaksiya Həsənovun taleyi ilə bağlı narahatlığını bildirir və redaktor müavininə qarşı qanunsuz əməllərə son qoyulmasını tələb edir, yerli və beynəlxalq hüquq müdafiə təşkilatlarından onun vəziyyətini nəzarətdə saxlamağı xahiş edir.

Həsənov həmçinin “Sumqayıt gənclərinin hüquqi maarifləndirilməsi” QHT-nin sədr müavinidir. Dünən o, şəhər hakimiyyəti tərəfindən təzyiqlərə məruz qaldığını bildirib. Hakimiyyət onu vətəndaş etirazlarının təşkilində və onları KİV-də işıqlandırmaqda ittiham edir. Xüsusən, şəhərin mikrorayonlarından birində ağac kəsilməsinə qarşı etiraz aksiyasına görə o, inzibati məsuliyyətə və cəriməyə məruz qoyulub. -06D-