Şişapanqmaya Azərbaycan ekspedisiyası: Alpinistlər yüksəklikdəki düşərgəyə doğru hərəkət edirlər

Himalayda 8037 metrlik Şişapanqma (Qosaintan) zirvəsinə Azərbaycan ekspedisiyasının üzvləri İsrafil Aşurlu və Firuz Dadaşov cümə günü yükəklikdəki 1-ci düşərgəyə çatıblar.

Ekspedisiyanın rəhbəri İsrafil Aşurlunun Turan-a verdiyi məlumata görə, sinoptiklər yaxşı proqnoz veriblər və alpinistlər bundan istifadə edərək, yüklərini yükdəklikdəki düşərgələrə boşaltmağa başlayıblar.

5 min metrdən çox yüksəklikdəki baza düşərgəsindən çıxan alpinistlər 1-ci düşərgəyə (təxminən 6 min m) çatıblar və gecəni orada keçiriblər.

Şənbə günü onlar yüklə yuxarıya doğru hərəkət edirlər və 2-ci düşərgəni quracaqlar, gecəni orada keçirəcəklər. Hava şəraiti imkan versə, bazar günü onlar daha da yüksəyə çıxmağa və 3-cü düşərgəni quraraq, gecəni orada keçirməyə çalışacaqlar. Daha sonra isə aşağıya enəcəklər.

Zəruri yükün boşaldılması və çadır qurulması (təchizat, ərzaq) və məhəccər çəkilməsi (hərəkət yolu üzrə sığorta ipi) alpinistlərə fəth üçün marşrut hazırlamaq imkanı verəcək.

Bu iş yalnız marşrut hazırlanması deyil, həm də alpinistlərin yüksəkliyə öyrəşməsi prosesidir. Qeyd edək ki, Aşurlu və Dadaşov idman üslubunda, yəni yüksəklik daşıyıcıları olmadan və oksigen balonlarından istifadə etmədən fəth həyata keçirirlər. Bütün bunlar böyük səy tələb edir və xeyli çətindir.

Düşərgə 3 qurulduqdan sonra alpinistlər baza düşərgəsinə qayıdacaq və istirahət edəcəklər. Onlar yenidən marşruta çıxmaq və 3-cü düşərgəyə qədər bütün yolu keçmək üçün orada havanın yaxşı olmasını gözləyəcəklər. 3-cü düşərgədən alpinistlər zirvənin fəthinə gedəcəklər.

Aşurlu bildirir ki, marşrutun bir hissəsi sıldırım buzlaqdan keçir və çatlaqlarla doludur. Hava sabit, amma çox syuqdur. Alpinistlər özlərini yaxşı hiss edirlər, döyüş əhval-ruhiyyəsindədirlər.

Dağda Azərbaycan alpinistlərindən başqa bir neçə xarici qrup da işləyir. -02D-