Qızını müdafiə edən Lənkəran sakini 4 il müddətinə həbs edilib

Dünən Lənkəran rayon məhkəməsi yerli sakin Şaiq Ağayev barəsində hökm çıxarıb. O, narkotik ticarəti ittihamı ilə 4 il müddətinə azadlıqdan məhrum edilib.

Ağayev bir il əvvəl İnternetdə qızının 8 saylı məktəbdə döyülməsi haqqında material yaydıqdan sonra həbs edilib.

Məktəb direktoru Ağayevdən “Lənkəranı bədnam edən videonu” İnternetdən çıxarmağı tələb edib, lakin Ağayev imtina edib. Bundan sonra o, Cənub Bölgəsi üzrə Narkotiklərə qarşı mübarizə İdarəsi polisi tərəfindən həbs edilib.

Ağayevlər ailəsinin məlumatına görə, məktəb direktoru DİN-in Narkotiklərə qarşı Mübarizə Baş İdarəsinin regional bürosunun əməkdaşlarından birinin qohumudur. 

6 fevral 2013-cü il səhər saatlarında maskalı şəxslər pəncərələri və qapıları qıraraq Ağayevlərin evinə girib. Onlar icazəsiz axtarış aparıblar, lakin heç nə tapmayıblar. Maskalı naməlum şəxslər Ş.Ağayevin övladlarının gözü önündə döyüblər və qollarını buraraq, aparıblar.

İstintaq Ağayevi 7,6 qr marixuana satmaqda ittiham edib. Guya o, aeroport yolunda narkotik satırdı. Lakin müstəntiq ehtimal olunan alıcını hələ də müəyyən etməyib. İşgəncə ilə Ağayevdən etirafedici ifadələr alıblar, o, məhkəmədə həmin ifadələrdən imtina edib. Bu iş üzrə istintaq bir ilə yaxın davam edib.

Ağayevin yetkinlik yaşına çatmamış üç övladı var və ailə o qədər ağır vəziyyətdədir ki, Ağayevin hüquqlarını müdafiə edən dövlət vəkili İbarət Həsənov ona öz pulu ilə dərman alıb. O, Ağayevin tamamilə təqsirsiz olduğunu bildirib.

Vəkil həmçinin hökmün sərt olduğunu qeyd edib, belə ki, bundan əvvəl Ağayev hətta kiçik xuliqanlıq belə törətməyib və fəhlə olub. Hökmdən apellyasiya məhkəməsinə şikayət veriləcək.

Hökm elan edildikdən sonra yanında ülgüc olan Ağayev intihar etməyə çalışıb, amma doğmalarının israrlı xahişlərindən sonra bu fikrindən əl çəkib.

Media Hüquqları İnstitutu (MHİ) da Ağayev barəsindəki hökmü pisləyib və onun İnternetdə ifadə azadlığına görə təqib olunduğunu hesab edir. -06D-