R.Çukerman: Dini baxımdan Azərbaycan Avropaya örnək ola bilər

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə bazar ertəsi öz iqamətgahında Fransa Yəhudi İnstitutları Təmsilçilik Şurasının (FYİTŞ) nümyəndələrini qəbul edib.

Adı çəkilən qurumun keçmiş rəhbəri Rişar Praskyenin rəhbərlik etdiyi nümayəndə hetəyinə qurumun indiki prezidenti Roger Çukerman,  vitse-prezident Francis Khalifat və FYİTŞ-nın İcra Şurasının vitse-prezidenti, Azərbaycan Dostları Assosiasiyasının İcra Şurasının üzvü Jean-Pierre daxildir.

A.Paşazadə Azərbaycanda dini durum barədə danışıb. Belə ki, QMİ sədri sovet dönəmində cəmi 17 məscid, 2 sinaqoq, 2 provoslav kilsəsi olduğunu deyib. Amma Azərbaycan dövləti müstəqillik əldə etdikdən sonra yeni məscidlər, sinaqoqlar,  provoslav və katolik məscidləri tikildiyini söyləyib. QMİ sədri bütün ibadət evlərinin dövlət vəsaiti hesabına tikildiyini nəzərə çatdırıb.

Bundan əlavə, A.Paşazadə qonaqların diqqətini dini sahədə tolerantlığa çəkib. Ölkədə dini konfessiya rəhbərlərinin lazım gəldiyi halda sinaqoqda, kilsədə və ya məsciddə toplanaraq müzakirə apara bildiklərini vurğulaıb. “Dini sahədə belə durumu Azərbaycandan kənarda görə biməzsiniz”, - deyə QMİ sədri qeyd edib. A.Paşazadə Azərbaycanın qonaqlarda maraq doğuracağı və bundan sonra Azərbaycana tez-tez gələcəkləri kimi proqnoz da verib.

R.Çukerman Azərbaycanda yəhudilərə münasibətin yaxşı olmasından məmnunluq duyduğunu deyib. Fransada da dini icmaların birgə yaşayış qaydalarını öyrənməyə can atdıqlarını vurğulayıb. Onun fikrincə, Azərbaycandakı dini münasibətlər nümunə sayıla bilər. Qonaq Azərbaycandakı dini durumu həm də dini icmaların münasibətləri düzgün qura bilməsinin nəticəsi kimi dəyərləndirib. Qurum rəhbəri Azərbaycanda yəhudilərə xoş münasibəti həm də Azərbaycan-İsrail münasibətlərinin müsbət göstəricisi hesab eidb. Söhbət əsnasında FYİTŞ prezidenti elə bu gün Azərbaycanın dövlət başçısı İlham Əliyev və dini komitə sədri Mübariz Qurbanlı tərəfindən qəbul olunduqlarını deyib. “Azərbaycan dini durum baxımından demokratik Avropaya nümunə göstərilə bilər”, - deyə R.Çukerman bəyan edib.

Daha sonra R.Çukerman QMİ sədrindən müsəlman gənclərin cihad adı altında terrorçu qruplara qoşulmasına aydınlıq gətirməsini istəyib. A.Paşazadə islam ölkələrindəki durumu fəlakətli adlandırıb. Bu fəlakətin təkcə müsəlman ölkələrini yox, bütün dünya ölkələrini hədələdiyini söyləyib və bu bəlaya qarşı dinindən asılı olmadan bütün dünya ölkələrinin müqavimət göstərməli olduğunu vurğulayıb.

Öz növbəsində, A.Paşazadə qaonaqdan “erməni soyqırımına” münasibətini soruşub. Qonaq 1915-ci ildə hadisələrə “tarixdə soyqırım baş verib” mövqeyi sərgiləyib, amma bunun Dağlıq Qarabağ hadisələrilə hər-hansı şəkildə əlaqəsi olmadığını söyləyib. “Biz azərbaycanlılarla və ermənilərlə də dost ola bilərik”, deyə R.Çukerman mövqeyinə “ədalətlilik” çaları qatmaq istəyib. Onun fikrincə, Qarabağ məsələsi dinc vasitələrlə həll edilməlidir və bunun başqa yolu yoxdur.

Öz növbəsində, QMİ sədri rəsmi İrəvanın 1915-ci il hadisələrini soyqırım adlandırmasını, Qarabağda azərbaycanlılara qarşı törətdikləri soyqırım hadisələri barədə susmasını ikiüzlülük və riyakarlıq hesab etdiyini vurğulayıb.

Görüşün sonunda A.Paşzadə qonaqlara hədiyyələr bağışlayıb. -05C-