Açiq mənbələrdən foto.
Readmissiya olunan şəxslərə repressiyalardan müdafiə zəmanəti verilməlidir - hüquq müdafiəçisi
Bakı/02.03.22/Turan: Martın 1-də Milli Məclisin İnsan hüquqları komitəsində müzakirəyə çıxarılan Ombudsmanın 2021-ci il üzrə məruzəsində Azərbaycana readmissiya olunan şəxslərin inteqrasiyası istiqamətində strateji sənədin hazırlanması təklif olunur.
Həmin sənəddə readmissiya olunan şəxslərin sosial problemlərin həlli istiqamətində bir sıra təkliflər yer alır.
Lakin hüquq müdafiəçilər tərəfindən iddia edilir ki, readmissiya olunan şəxslərin bəziləri siyasi təqiblərə məruz qalır.
Ötən il Almaniyadan deportasiya edilmiş bir neçə nəfər narkotik ittihamıyla hazırda həbsdədir. Onlar ittihamı rədd edir və öz siyasi baxışlarına görə həbs edildiyini bildirir.
Həmin sənəddə bu məsələ öz əksini tapmalıdırmı?
Milli Məclisin deputatı Aydın Mirzəzadə Turan-a bildirib ki, istənilən iddia irəli sürülərkən mütləq faktlar göstərilməlidir. "Konkret göstərilməlidir. Filankəs, filan vaxtı, filan məsələ. Amma bunlar yoxdur".
Deputat qeyd edib ki, Azərbaycan demokratik hüquqi dövlətdir. "Dünyaya açıqdır. Vətəndaşlarımız sərbəst hərəkət edə bilirlər. Xarici vətəndaşlar da ölkəmizə sərbəst gələ bilirlər. Bu baxımından vətəndaşlarımız xaricdə vətəndaşlıq almaq üçün müraciət edirlər, imtina cavabı aldıqda isə həmin ölkədən deportasiya olunur və Azərbaycana qayıdır. İndiyə qədər dəfələrlə belə hadisələr olub, həmin şəxslər ölkəyə qayıdıblar və yenidən öz həyatlarına davam ediblər".
Onun sözlərinə görə, xüsusi mərkəzlərə ehtiyac ola bilər ki, ölkəyə qaytarılan vətəndaşlar qayıtdıqdan sonra onların reinteqrasiyası asanlaşsın. "Onların yaşayış yeri, iş yeri tapılmasında, uşaqların təhsilə cəlb edilməsində köməyə ehtiyac var. O, heç də izolyasiya məntəqəsi kimi başa düşülə bilməz. Və vətəndaş istəməzsə, həmin mərkəzin xidmətindən imtina da edə bilər. Həmin mərkəzlər yaradılacaqsa jurnalistlər və hüquq müdafiəçilər həmin mərkəzin fəaliyyətini izləyə biləcəklər".
A.Mirzəzadə qeyd edib ki, readmissiya olunan şəxslər Azərbaycan vətəndaşlarıdır. "Onların siyasi baxışları, onların fəaliyyəti onların öz hüququdur".
Vətəndaş Hüquqları İnstitutunun rəhbəri Bəşir Süleymanlı da bildirib ki, xaricdən Azərbaycana qaytarılan insanların sayı çoxalıb. "Bunun özü də bəzi şübhəli məqamlar yaradır. Məsələn, Baş prokurorun həmin Avropa ölkələrinə səfəri, orada müəyyən görüşlərin keçirilməsi cəmiyyətdə şübhələr doğurur ki, orada siyasi sığınacaq üçün müraciət edən şəxslərin ölkəyə gətirilməsi üçün hansısa bir hüquqi prosedurların həyata keçirilməsi ilə bağlıdır. Amma əlimizdə bunu təsdiq edən sənədlər yoxdur".
Hüquq müdafiəçisinin fikrincə, ombudsman readmissiya olunan şəxslərlə bağlı sənədin qəbul edilməsini təklif edirsə, orada ölkəyə daxil olan vətəndaşların təhlükəsizliyinin təmin olunması ilə bağlı da bir hissə öz təsdiqini tapmalıdır. "Çünki insanlar əgər ölkəyə gəlirsə, təkcə onların sosial problemləri məsələsi qeyd olunmamalıdır, siyasi baxışlarına görə ölkədən gedən şəxslərin də geri qayıdarkən onların təhlükəsizlik şəraitində yaşaması üçün sənədə bir maddə salınmalıdır. Xeyli sayda insan təqib olunduqlarına görə ölkədən gedib və hər hansı səbəbə görə ölkəyə qayırdarkən burada repressiyalara məruz qalmalı deyillər. Ombudsman bu sahədə də öz missiyasını həyata keçirməlidir". -0-
-
- Maliyyə
- 2 Mart 2022 15:57
Cəmiyyət
-
Bakıda Dövlət Yol Polisinin mobil patrulları taksi sürücülərini müvafiq icazələr əsasında işə cəlb etmək və taksidə yeni iş qaydalarını izah etmək üçün reydlər keçirirlər. Reydlərdə Azərbaycan Yerüstü Nəqliyyat Agentliyi (AYNA) iştirak edir, - Bakı Şəhər Dövlət Yol Polisi İdarəsi bildirir. Eyni reydlər Sumqayıt şəhərində də müşahidə olunub.
-
Uzun illərdir Xəzər dənizinin səviyyəsinin azalması həm hidroloqların, həm də geniş ictimaiyyətin ciddi narahatlığına səbəb olub. Azərbaycanda dəniz səthinin xeyli azalması Sumqayıtda və Bakı Dəniz Bulvarı boyunca dənizin dayazlaşması ilə özünü büruzə verirdi. Lakin son vaxtlar hava şəraiti yeni ümidlər yaradıb.
-
Bazar günü, mayın 19-da Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Mülayim cənub-qərb küləyi əsəcək. Havanın temperaturunun gecə 10-13 dərəcə, gündüz 16-20 dərəcə isti olacağı ehtimal edilir, xəbəri Milli Hidrometeorologiya Xidməti yayıb.
-
Mayın 17-də gün ərzində Azərbaycanda kiber üsullarla ən az 22 halda bank kartlarından abunəçilərə məxsus pullar oğurlanıb.
Rəy yaz