RƏK işgəncələrə son qoyulmasını və təqsirkarların cəzalandırılmasını tələb edir

Bakı/27.05.19/Turan: Repressiyalar və İşgəncələr Əleyhinə İctimai Komitə (RƏK) bəyanat yayaraq, məhbuslara qarşı qeyri-insani rəftar faktlarına diqqət cəlb edib.

"2018-ci ilin iyulunda Gəncə hadisələri üzrə təqsirləndirilən şəxslərin işi üzrə məhkəmə prosesləri bir daha təsdiq edir ki, bu hadisələr zamanı çox sayda insan əsassız olaraq həbs edilib və dəhşətli işgəncələrə məruz qoyulub", deyə RƏK-in mayın 26-da yaydığı bəyanatda bildirilir.

Bu zaman DİN, Baş Prokurorluq və digər orqanlar qanunsuzluğa yol vermiş şəxslərə qarşı tədbirlər görmək yerinə işgəncə faktlarını ictimaiyyətə yayan şəxsləri təzyiq hədəfi seçiblər.

Yeni işgəncə faktlarının aşkar edilməsinə və qanunsuz həbslərə baxmayaraq, müvafiq orqanlar ciddi araşdırma aparmır, tədbir görmür.

"Digər tərəfdən, "Gəncə işi" üzrə həbs edilmiş Aydın Qurbanov, Şahin Verdiyev, Asif Cavadov, Şahlar Rzayev, Eşqin Quliyev, Vüqar Xudiyev, Elvin Əliyev və başqalarının səhhətinin ağır olmasına baxmayaraq, onların müalicəsi üzrə heç bir tədbir görülmür. Həmçinin, Gəncə hadisələri üzrə şübhəli bilinən Əli Sərxaninin qəribə şəraitdə öldürülməsi ilə bağlı məsələyə aydınlıq gətirilməyib. 10 aydır onun cəsədi ailəsinə təhvil verilmir", deyə bəyanatda qeyd edilir.

RƏK həmçinin 2017-ci ilin mayında "Tərtər işi" üzrə 200-ə yaxı hərbi qulluqçunun həbs edildiyinə, işgəncələrə məruz qoyulduğuna diqqət çəkir.

"İşgəncələrdən ən az 9 nəfər dünyasını dəyişib. Bu gün 24 nəfər həbsdədir. Hərbiçilərə qarşı işgəncə faktları məhkəmə sənədlərində əksini tapsa da, müvafiq orqanlar kifayət qədər və ədalətli addımlar atmır.

Və bu gün həm həbsdə olan, həm də azadlıqda olan bir çox hərbi qulluqçu hələ də bu işgəncələrdən əziyyət çəkir", deyə sənəddə qeyd edilir.

RƏK həmçinin mayın 11-də Şəki polisində Qalib Məmmədovun "amansız işgəncələrdən" dünyasını dəyişdiyini bildirir. İki həftə keçib, amma müvafiq dövlət orqanları susur.

Baş prokuror yanında Korrupsiyaya qarşı Mübarizə Baş İdarəsinin əməkdaşı Emin Hüseynovun Türkiyədə müəmmalı ölümü ilə bağlı da tədbir görülmür.

Hərbi xidmətdə Razi Mustafayevin öldürülməsi, Bakı məktəblərindən birinin 8-ci sinif şagirdinin intihar həddinə çatdırılması, Pərviz Həbibovun ölənə qədər döyülməsi də lazımi səviyyədə araşdırılmır.

Araşdırma zamanı müəyyən edilib ki, həbsdə saxlama yerlərində ümumilikdə 30-dan çox insan qəribə şəraitdə öldürülüb, deyə bəyanatda vurğulanır.

Həmçinin, Azərbaycan Xalq Hərəkatının mayın 18-də saxlanılmış iki fəalı - İlyas Abdullayevin və Yavər Mikayılovun taleyi haqqında məlumat olmadığı, siyasi məhbuslar Əhsən Nuruzadə, Babək Həsənov, Məhəmmədəli Axundzadə və başqalarının əsassız olaraq karserə salındığı, Ruhulla Axundzadə, Şamil Abdullayev, Cabbar Cabbarov, Abbas Hüseynov, Əbülfəz Bünyatov, Seyfəddin Şirvanov və başqalarının səhhətində ciddi problemlər olduğu qeyd edilir.

RƏK qanunsuz həbsləri, işgəncələri, qəribə şəraitdə qətlləri pisləyir və buna son qoyulmasını tələb edir, Baş Prokurorluğu təqsirli şəxsləri məsuliyyətə cəlb etməyə çağırır. -06D-