Rusiyaya təhvil verilmiş Tokayev qısa müddət azadlıqda olub

Bakı/15.03.19/Turan: Azərbaycanın Rusiyaya təhvil verdiyi birinci və ikinci Çeçen Müharibələrinin iştirakçısı Səid Hüseyn Tokayev 2004-cü ilin oktyabrında "Əl-Qaidə" beynəlxalq terror təşkilatı ilə birbaşa əlaqəsi olan qrupa daxil olan digər şəxslərlə bilrikdə həbs edilib. Qrup "Əl-Qaidə"nin Qafqaz üzrə əlaqələndiricisi Əbu Hafzanın sərəncamını həyata keçirirdi.

Azərbaycanın Milli Təhlükəsizlik Nazirliyi yalnız 2005-ci ilin iyulunda qrup üzvlərinin saxlanması və qrupun zərərsizləşdirilməsi barədə məlumatı məxfilikdən çıxarıb.

MTN-in məlumatına görə, qrup Azərbaycan və onunla qonşu ölkələrin ərazisində terror aktları hazırlayırdı.

Həmin vaxt MTN-in yaydığı məlumata görə, yarım il ərzində Azərbaycanın beynəlxalq antiterror koalisiyasından olan tərəfdaşlarının iştirakı ilə beynəlxalq səviyyədə tədbirlər kompleksi həyata keçirilib. Nəticədə dünyanın müxtəlif ölkələrində qrupun əlbirlərindən ibarət bütöv bir şəbəkə ifşa olunub.

İstintaq hərəkətləri zamanı on minlərlə dollar, 10-dan çox məsafədən idarə olunan partlayıcı mexanizm, silah, "Kenwood" filmasının 100-dən çox radiostansiyası, habelə 18 ədəd keçmiş SSRİ vətəndaşlarının adına verilmiş Fransa, İran, İordaniya, Tunis, Mərakeş, Səudiyyə Ərəbistanı, Gürcüstan və Rusiya pasportu müsadirə edilib.

Səid Hüseyn Tokayev və daha iki RF vətəndaşı Əlixan Balayev, Süleyman İsayev 12 il müddətinə azadlıqdan məhrumetmə cəzasına məhkum edilib.

Azad edildikdən sonra Tokayev Azərbaycanda olub və BMT Ali Komissarlığının Qaçqınların işi üzrə idarəsinin Bakı ofisində qeydiyyatda olub.

Fevralın 16-da Turan Tokayevin ekstradisiyası haqqında sualla dövlət orqanlarına müraciət edib, amma dövlət qurumları cavabdan yayınıblar. Bu gün hələ də heç bir şərh yoxdur. -0-