Müəllim Rövşən Əzizov: �Hakim məktəbin direktoruna qarşı araşdırma aparılmasını qərara alıb�

Bakı/15.03.18/Turan: Bu gün Nizami Rayon Məhkəməsində 220 saylı məktəb-litseyin müəllimi Rövşən Əzizovun onu işdən çıxaran məktəb rəhbərliyinə qarşı iddiası üzrə iclasın sonu proses iştirakçılarının hamısı üçün gözlənilməz olub.

Müəllimin işdən çıxarılmasını tələb edən Qarabağ Azadlıq Təşkilatı (QAT) nümayəndələrinin məktəbə gəlişini (20 dekabr 2017-ci il) əks etdirən videonun izlənməsi ilə bağlı R.Əzizovun dünənki vəsatətinə baxan hakim Məzahir Sadıqov QAT ilə insidentin ayrıca araşdırılmasını qərara alıb.

Prosesdə iştirak edən direktor hakimin bugünkü qərarından təəccüblənib və qəzəblənib. Növbəti iclas martın 25-nə təyin edilib.

"Çərşənbə günü mən məhkəməyə videoyazı təqdim etdim. Orada görünür ki, QAT nümayəndələri məktəbə gələrək direktordan məni işdən çıxarmağı tələb edirlər. Guya mən məktəbliləri ermənilərlə dostluq etməyə çağırıram, uşaqlardan erməni ordusu üçün əsgər hazırlayıram. Videodan görünür ki, QAT üzvləri mühafizə xidmətini keçərək məktəbə daxil olurlar, direktorun kabinetində mənim əleyhimə danışırlar, məktəbin dərs hissə müdiri isə bu adamların binadan çıxmasını tələb etmək əvəzinə barmağı ilə mənə kabinetdən çıxmağı əmr edir", - R.Əzizov Turan agentliyinə bildirib.

Xatırladaq ki, QAT məktəb rəhbərliyindən ingilis dili müəllimi Rövşən Əzizovun işdən çıxarılmasını tələb edib. Onu şagirdlər arasında azərbaycanlıların və ermənilərin barışması ideyasını təbliğ etməkdə ittiham edib. 5 gündən sonra direktor müəllimi işdən çıxarıb. Müəllim ailəsini (azyaşlı uşağı var) dolandırmaq üçün vəsaitsiz qalıb.

Bundan öncə Xəzər televiziyasında R.Əzizovun qabaqcıq, uğurlu pedaqoji metodundan bəhs edən videosüjet göstərilib. Şagirdlər onun barəsində razılıqla danışıblar. Belə süjet Rusiyanın "Dojd" telekanalında da nümayiş etdirilib. https://tvrain.ru/teleshow/vechernee_shou/uchitel-459463/

Məktəb direktoru R.Əzizovun işdən çıxarılmasını sistematik olaraq daxili qaydaları pozması ilə əsaslandırıb. Halbuki, R.Əzizovun şəxsi işində töhmət və irad yoxdur.

Bu ilin fevralında 220 saylı məktəbdə başqa bir hadisə baş verib. Direktorun işdən çıxardığı dərs hissə müdiri Zeynəb Rzayevanın qardaşı, aktyor Rza Rzayev Mirzəliyevin kabinetinə gələrək əgər bacısınnı əvvəlki işinə bərpa etməsə onun şalvarını soyunduracağı ilə hədələyib.

R.Rzayev tərəfindən hədə-qorxu barədə video: https://youtu.be/JSTW3kQkPug

Turan-ın müxbiri 220 saylı məktəbə üç dəfə zəng edib, hər dəfə katibə deyib ki, direktor məktəbdə yoxdur.

QAT sədri Akif Nağı Turan-a müsahibəsində etiraf edib ki, onun təşkilatının üzvləri məktəbə gedərək erməni təbliğatına son qoyulmasını tələb ediblər. "Söhbət etik çərçivədə keçdi. Müəllimin işdən çıxarılmasına sosial şəbəkələrdə ona qarşı başlanan kampaniya səbəb ola bilər", - A.Nağı qeyd edib.

P.S. Son anda məlum olub ki, məhkəmə müəllimin iddiasını təmin etməyib. Belə ki, onun işdən çıxarılması ilə bağlı məhkəmə iddiası qaldırması üçün qanunla müəyyən edilmiş vaxt bitib.-0-