Şahidlər bank vəsaitlərinin mənimsənilmədiyini sübut edirlər

Cümə axşamı Bakı Ağır Cinayətlər Məhkəməsində AMAY şirkətinin rəhbəri Abdulla Abdullayev və təqsirləndirilən daha 5 nəfər üzərində məhkəmə prosesi davam edib.  

Prosesdə öncə istintaqın “zərərçəkən” kimi tanıdığı sonuncu 4 nəfər dindirilib.

Onlardan 3 nəfər Atatürk prospekti 80/78-37-də mənzil aldıqları binanın tamamlanmasını istəyiblər. Bir nəfər isə pul ödəsə də, mənizl ala bilmədiyini deyib. Məhkəmə araşdırmasında AMAY əməkdaşları zərərçəkənə ona aid mənzilin 18-ci yox, 17-ci mərtəbədə olduğunu bildiriblər. Orxan Cəfərov adlı şəxs nənəsinin həmin binadan aldığı qeyri-yaşayış sahəsinə hüquqi varis olduğunu deyərək, sahənin başqasına satıdlığını iddia edib. Yenə məhkəmədə məlum olub ki, o yer də satılmayıb, sadəcə bir nəfər tərəfindən məhkəmə qaydasında mübahisələndirilib, amma məhkəmə qarşı tərəfi haqlı sayıb.

Daha sonra məhkəmə prosesində şahidlərin dindirilməsi prosesinə start verilib. Şahidlər əsasən “Texnikabank”dan kreditlərin götürülməsi, firmaların yaradılması, maliyyə vəsaitlərinin haraya xərclənməsi barədə sualları cavablandırıblar. 

Şahidlər “Texnikabank”dan kreditlərin firmalar vasitəsilə götürüldüyünü deyiblər. Firmaların yaradılmasına gəlincə, təklifin “Texnikabank”dan gəldiyini deyiblər və bu mqəsədlə 40-a yaxın firma yaradıldığını bəyan ediblər. Şahidlərin sözlərinə görə, bank həmin krediti birdəfəyə verə bilməyəcəyini deyib. Buna görə, firmalar yaradılıb. Firmalar adlarına olan şəxslər firmaya ayrılan vəsaitlərin alınmasına dair qəbzləri imzalayıblar. Maliyyə vəsaitləri isə firmaların hesabından AMAY-ın tərkibində fəaliyyət göstərən “Birlikbank”ın hesabına köçürülüb. 40 milyon manatdan çox vəsait Nobel prospektindəki AMAY-a məxsus “Xətai” ticarət mərkəzinin dam örütyünün tamamlanmasına sərf edilib. Şahidlər həm də həmin maliyyə vəsaitlərinin banka qaytarıldığını nəzərə çatdırıblar. Beləliklə, ittiham tərəfin dövlət vəsaitinin külli miqdarda mənimsənilməsi ittihamını darmadağın ediblər. Bundan əlavə, şahidlər AMAY-ın götürülən maliyyə vəsaitlərilə bağlı “Texnikabank”a monitorinq keçirməyə imkan verməməsi haqda bankın iddiasının da əsassız olduğunu deyiblər. Şahidlər “Texnikabank”dan götürülən maliyyə vəsaitlərinin iki qatına bərabər AMAY-ın banka əmlak girovu qoyduğunu deyiblər. Bu faktlardan irəli gələrək, şahidlər istintaqın AMAY tərəfi  dələduzluqda ittiham etməsini də əsassız sayıblar. 

Firma rəhbəri Şəfaət Həsənov ifadə vermək üçün gəldiyi Korrupsiyaya qarşı Mübarizə İdarəsində həbsə alınacağı kimi psixoloji təzyiqlərə məruz qaldığını nəzərə çatdırıb. 

Atatürk prospektindəki binanın tamamlanmasına gəlincə, binanı tikən “Xudafərin” firmasının bir müddət rəhbəri olmuş Anar Məmmədli burada çoxsaylı faktorlar olduğunu bildirib. O, 2005-ci ildən sonra tikinti materiallarının qiymətlərinin artmasını, prokurorluğun firmanın işinə müdaxilə etməsini və buna görə tikinti işlərini dayandırmağa məcbur olduqlarını söyləyib. 

Hakim Əfqan Hacıyev növbəti məhkəmə prosesini mayın 15-nə təyin edib.

AMAY şirkətinin rəhbəri A.Abdullayev 2014-cü ilin aprelində həbsə alınıb. Ona qarşı Cinayət Məcəlləsinin dələduzluq, dövlət vəsaitini külli miqdarda mənimsəmək, səalhiyyətindən sui-istifadə, “çirkli” pulların leqallaşdırılması ittihamları irəli sürülüb. A.Abdullayev ittihamları birmənalı rədd edərək özünü təqsirli bilmir.-05C-