Bakı/13.11.18/Turan:"Mirtağı Əsədova Gürcüstanda heç vaxt təzyiq olmayıb. Çünki onun fəaliyyəti həmişə açıq, ictimaiyyətə bəlli olub. Ona görə də Mirtağının saxlanılması haqqında bir şey deyə bilmərəm", - noyabrın 7-də axşam Azərbaycan sərhəddində saxlanıldığı bildirilən Gürcüstan Müsəlmanları Ali Dini İdarəsinin sədri şeyx Mirtağı Əsədovun həyat yoldaşı Şahanə Hacıyeva Turan-a bildirib.
O 5 gün ötsə də həyat yoldaşından xəbər ala bilmədiklərini deyib.
Həyat yoldaşının heç vaxt qanundankənar addım atmadığını vurğulayan Ş.Hacıyeva rəsmi qurumlara müraciət etsə də hələ ki nə həyat yoldaşı ilə görüşə bilib, nə də ona rəsmi bilgi verilib: "Mənə noyabrın 7-də zəng vurub saxlanıldığını xəbər vermişdi. Həmin gündən bəri hər gün Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə (BMCMİ) müraciət etmişəm. Ancaq mənə cavab verməyiblər. Hesab edirəm ki, məlumat vermirlərsə, ola bilsin, ona təzyiq edirlər".
Ş.Hacıyeva məsələ ilə bağlı noyabrın 12-də Gürcüstanın Bakıdakı səfirliyinə müraciət etdiyini, qəbul olunduğunu deyib, səfirlik M.Əsədovun məsələsi ilə ciddi şəkildə məşğul olduğunu bildirib.
Ş.Hacıyeva hüquq xidməti üçün vəkillə müqavilə bağladıqlarını, amma hələ də həyat yoldaşından xəbər ala bilmədiyini söyləyib.
Gürcüstan Tolerantlıq və Müxtəliflik İnstitutu müəyyən edib ki, hələlik, M.Əsədova qarşı rəsmi ittham irəli sürülməyib, institutun təmsilçisi Şota Tutberidze Turan-a deyib ki, bu günə qədər əldə etdikləri məlumat ancaq budur.
"Saxlanılmasının səbəbləri izah edilməyib. Ailəsi də harada olduğunu bilmir. Onun vəkil hüququ da pozulub" deyən Tutberidze hesab edir ki, M.Əsədov qanunsuz saxlanılıb.
Azərbaycanin əlaqəli qurumlarından, hələlik M.Əsədovun saxlanılması barədə deyilənlərə rəsmi münasibət almaq mümkün olmayıb.
Xatırladaq ki, Gürcüstan Müsəlmanları Ali Dini İdarəsinin sədri şeyx Mirtağı Əsədovun noyabrın 7-də Azərbaycan-Gürcüstan sərhəd buraxılış məntəqəsində saxlanılıb. Bu haqda həmin idarə açıqlama yayıb.
M.Əsədovun əvvəllər Azərbaycan vətəndaşı olduğu, 2 ilə yaxındır ki, vətəndaşlıqdan imtina etdiyi vurğulanır. Üstəlik, onun ailəsinin Azərbaycanda yaşadığı bildirilir. Verilən məlumata görə, ailəsinə baş çəkməkdən ötrü ildə bir neçə dəfə Azərbaycana gəlir. -05D-
Cəmiyyət
-
Son günlər ictimaiyyətin diqqəti 2024-cü il noyabrın 8-də Bakıda açılışı keçirilən Qarabağ Müharibəsinə həsr olunmuş yeni Qələbə Abidəsi ətrafında yaranan vəziyyətə yönəlib. Azərbaycanın tanınmış memarı və tarixi memarlıq artefaktlarının tədqiqatçısı Elçin Əliyev abidənin detalları ilə bağlı fotoşəkillər çəkməyə çalışarkən mülki geyimdə olan şəxslərin gözlənilməz maneəsi ilə üzləşib.
-
Şəmkir rayonunda suyun səviyyəsinin ildən-ilə azaldığı Zəyəmçay məişət tullantıları ilə çirkləndirilir, yerli sakinlər bildiriblər. Çayın təmizlənməsi üçün aidiyyatı qurumlara müraciət etsələr də, tədbir görülməyib.
-
Cümə günü paytaxtda hava dəyişkən olacaq. Gecə bəzi yerlərdə yağış yağa bilər. Mülayim cənub-qərb küləyi əsəcək, axşam şimal-qərb küləyinə geçəcək. Havanın temperaturu gecə müsbət 10 +12, gündüz müsbət 13 + 17 dərəcə, rütubət 70-80 faiz olacaq.
-
Dünyanın 28 ölkəsinin 100 universitetini təmsil edən 159 professor və müəllimdən ibarət koalisiya Azərbaycanın ekologiya və təbii sərvətlər naziri və COP29-un prezidenti Muxtar Babayevi 2023-cü ilin iyulundan qeyri-müəyyən müddətə ev dustaqlığında olan alim iqtisadçı və ekologiya fəalı, doktor Qubad İbadoğlunun azadlığa buraxılmasını müdafiə etməyə çağırıb. Azərbaycanın COP29 iqlim konfransına ev sahibliyi etdiyi bir vaxtda göndərilən məktubda doktor İbadoğlunun kritik səhhətinə və onun korrupsiya ilə mübarizəyə və qalıq yanacaq sənayesində şəffaflığın təşviqinə verdiyi töhfələrə istinad edərək, təcili tədbirlər görülməsinə çağırılır.
Rəy yaz