Sivil Toplum Platforması vətəndaşları vəkilləri müdafiə etməyə çağırır

Sivil Toplum Platforması vəkil Yalçın İmanova təzyiqlərlə bağlı bəyanat yayıb.

Sənəddə deyilir ki, vəkil Yalçın İmanovun peşə fəaliyyəti ilə bağlı intizam məsuliyyətinə cəlb olunması üçün Nərimanov Rayon Məhkəməsinin hakimi Turqay Hüseynov Vəkillər Kollegiyasına müraciət barədə qərar qəbul edib.

 “Yalçın İmanovun intizam məsuliyyətinə cəlb olunması tələbi onun hakimlərin və dövlət ittihamçısının verilən vəsatətlərə formal yanaşmasını söyləməsi ilə bağlıdır. Bundan əvvəl də analoji hal başqa vəkillərə qarşı baş verib. Belə ki, vəkilliyə qəbul edilməyən və ya vəkillikdən uzaqlaşdırılan İntiqam Əliyev, Qurban Məmmədov, Aslan İsmayılov, Namizəd Səfərov, Lətifə Əliyeva, Elçin Namazov, Xalid Bağırov, Əlayif Həsənov, Hidayət Süleymanov və başqa 10-dan çox vəkilin adını çəkə bilərik. Beləliklə, insan haqlarını qoruyan və peşə fəaliyyətini ləyaqətlə yerinə yetirməyə çalışan vəkillərə təzyiqlər bu gün də davam edir və artıq sistemli şəkil alıb”, - bəyanatda qeyd edilir.

Sivil Toplum Platforması bildirir kl,  Azərbaycanda müstəqil vəkil birlikləri yoxdur, vəkillik bütünlüklə Vəkillər Kollegiyasının inhisarındadır.

“Vəkillərə basqıların, habelə, vəkillik qurumunun vəkilliyə qəbulla bağlı tətbiq etdiyi sərt qaydaların nəticəsidir ki, Azərbaycan adambaşına düşən vəkil sayına görə inkişaf etmiş Avropa ölkələrindən, hətta Cənubi Qafqaz respublikalarından da geri qalır. Azərbaycanda hər 10 min vətəndaşa bir vəkil də düşmür. Qonşu Gürcüstanda hər 10 min nəfərə 8, Ermənistandasa 4 vəkil xidmət göstərir. İnkişaf etmiş ölkələrdə - İsraildə 10 min nəfərə 50, Türkiyədə 11, ABŞ-da isə 300 amerikalıya bir vəkil düşür”, - sənəddə qeyd edilir.  

Sivil Toplum Platforması vətəndaşlarıa müraciət edərək onları güclü vətəndaş olmaq naminə vəkilləri dəstəkləməyə çağırır.-03D-