Siyasi mühacirlərin qohumlarına təzyiqlərə son qoyulsun!

Çərşənbə axşamı Siyasi Məhbusları Müdafiə Mərkəzi (SMMM) siyasi mühacir Orduxan Temirxanın qohumlarına təzyiqlər, həmçinin siyasi fəallara qarşı repressiyaların gücləndirilməsi ilə bağlı ictimai müzakirələr keçirib. Tədbirdə “Nardaran işi” üzrə monitorinqin hesabatı təqdim olunub.

SMMM-in koordinatorlarından biri Oqtay Gülalıyev bildirib ki, Nardaran işi üzrə 87 nəfər cinayət məsuliyyətinə cəlb edilib. 7 nəfərin barəsində axtarış elan olunub.

2016-cı ilin may-iyun aylarında 30 nəfər qanunsuz narkotik maddə saxlamaq ittihamı ilə Sabunçu Rayon Məhkəməsi tərəfindən mühakimə olunub.

O.Gülalıyev bildirib ki, əslində 2015-ci il noyabrın 26-da Nardaranda “Müsəlman Birliyi” Hərəkatının lideri Taleh Bağırzadə və onun tərəfdarlarına  qarşı silahlı təxribat törədilib.  Dindarlarda silah olmayıb.

Hüquq müdafiəçisi diqqəti ona yönəldib ki, polis əməliyyata dair videoçəkilişləri ictimaiyyətə və məhkəməyə təqdim etməyib.

Baxmayaraq ki, Y.Bağırzadənin və digər 17 nəfərin işi üzrə məhkəmə prosesində müttəhimlər onlara verilən işgəncələr haqda danışıblar, vəkillər ittihamların saxta olduğunu bildiriblər, məhkəmə onların hamısını 10 ildən 20 ilədək müddətə azadlıqdan məhrum edib.

Siyasi mühacir və bloger Orduxan Temirxan skayp vasitəsilə tədbir iştirakçılarına qoşularaq son günlər ailə üzvlərinə və qohumlarına ona təzyiqlərdən danışıb.

Onun sözlərinə görə, fevralın 18-də qardaş və bacılarının ailə üzvləri polisə çağırlıb. Suraxanı polisində onlardan tələb edilib ki, O.Temirxan xaricdə bloger və siyasi fəaliyyətinə son qoysun.

Fevralın 19-da qadınları buraxıblar. Ancaq blogerin böyük qardaşı Xanları və bacısı oğlu Səbuhini 30 sutkalığa həbs ediblər. Martın 12-də gəncin toyu olmalıdır.

Vəkil onun azadlığa buraxılması üçün apellysiya şikayəti verib.

“Bizi cəzalandırmaq üçün bacılarımızı, hətta uşaqlarımızı polisə aparırlar. Ancaq bu gün prezident öz həyat yoldaşını birinci vitse-prezident təyin edib. Yəni, öz ailə üzvlərini ucaldırlar. Görün, ölkə nə pis gündədir. Hər bir vətəndaş bu cür qanunsuzluğa qarşı mübarizə aparmalıdır. Hakim ailə başa düşməlidir ki, təzyiqlə xalqın narazılığını yatırmaq olmaz. Mənim ailəmə qarşı repressiyalara son qoyacaqlar, ya yox, bilmirəm, ancaq məni susdurmaq mümkün olmayacaq, mən mübarizəmi davam etdirəcəm”, -O.Temirxan bildirib.

Jurnalist və hüquq müdafiəçisi Əvəz Zeynallı hakimiyyətni bütün qırmızı xətləri keçdiyini deyib.

“Son illər Azərbaycanda görünməmiş şeylər baş verir. Biz eyni vaxtda ər və arvadın, ata və oğulun həbsinin şahidi olmuşuq. İndi də polisə fəalların analarını, bacılarını aparırlar. Bu, artıq bütün qırmızı xətləri keçmək deməkdir”, -Ə.Zeynallı vurğulayıb.

Tədbir iştirakçılarına qoşulan hüquq müdafiəçisi Leyla Yunus deyib ki, Temirxanın qohumları ilə baş verənlər göstərir ki, tənqid edənlərin ailə üzvlərinin girov götürülməsi hakimiyyət üçün normaya çevrilir.

“Görürük ki, Avropada da mübarizə aparılması hakimiyyətə böyük zərbə vurur. Orduxanın qardaşı və bacısı oğlunu 6-7 il azadlıqdan məhrumetmə cəzasını  nəzərdə tutan maddə ilə ittiham ed bilərdilər. Ancaq Facebook-da ictimai etirazlar hakimiyyəti məcbur etdi ki, 30 sutka ilə kifayətlənsin. Etirazların sayəsində hakimiyyət başa düşdü ki, qırmızı xətti keçir”, - L.Yunus bildirib.

Tədbir iştirakçıları bu fikrə gəliblər ki, repressiyaları ancaq ictimaiyyətin səylərini birləşdirməklə dayandırmaq olar. Onlar bütün siyasi məhbusların, həmçinin son günlər həbs olunan fəalların  azadlığa buraxılmasını tələb ediblər.—36C--