SMDT: Müstəqil müşahidəçilərin rəyləri öyrənilməli və araşdırılmalıdır

Seçkilərin Monitorinqi və Demokratiyanın Tədrisi Mərkəzi (SMDT) 9 Oktyabr 2013-cü il prezident seçkisi üzrə yerli və beynəlxalq təşkilatların rəyləri ilə bağlı dövlət rəsmilərinin verdiyi siyasi bəyanatlara təəssüf edərək, bildirir ki, hakimiyyət Mərkəzi Seçki Komissiyası və Dairə Seçki Komissiyalarına seçki günü baş vermiş qanun pozuntuları ilə bağlı məlumatlar və şikayətlərın obyektiv araşdırılması ilə bağlı siyasi iradə nümayiş etdirməlidir. 

SMDT təəssüflə qeyd edir ki, ATƏT-in Demokratik Təsisatlar və İnsan Hüquqları Bürosunun ATƏT-in Parlament Assambleyası ilə birgə Müşahidə Missiyasının yaydığı İlkin Bəyanat Azərbaycan rəsmiləri tərəfindən etirazla qarşılanmış, seçki günü baş vermiş qanun pozuntularını qiymətləndirməyə yönəlməmişdir. 

SMDT həmçinin qeyd edir ki, müxtəlif media orqanları və veb portallarda, o cümlədən APA, Trend agentlikləri, Space, Xəzər televiziyaları, Yeni Müsavat və 525-ci qəzetlərdə “SMDT seçkinin nəticələrini tanıyır” başlıqlı xəbərlər həqiqəti əks etdirmir. Bu cür yanlış məlumatlar müstəqil müşahidə təşkilatı olan SMDT-nin və onunla əməkdaşlıq edən vətəndaşların peşəkar fəaliyyətini ləkələməyə yönəlib. SMDT həmçinin bildirir ki,  hakimiyyətin himayəsində olan qrupların təşkil etdiyi monitorinqlərin, o cümlədən Qərb-Resurs Vətəndaş Cəmiyyətinin İnkişafına Dəstək İctimai Birliyinin seçki günü müşahidə üzrə yaydığı bəyanatın SMDT-yə aiddiyyəti yoxdur. 

SMDT təəssüflə bildirir ki, seçki günü daxil olmuş hesabatlara əsasən müşahidə aparılan məntəqələrin 91 faizində müxtəlif növ qanun pozuntuları aşkarlanıb. Bu pozuntulara səsvermənin gizliliyinin pozulması, bir şəxsin başqalarının əvəzinə səsverməsi, seçki qutularına saxta bülletenlərinin atılması, adları seçici siyahılarında olmayan şəxslərin kütləvi şəkildə səsvermədə iştirakı, səsvermənin nəticələrinin protokolda düzgün əks edilməməsi, seçicilər və müşahidəçilərə təzyiqlər və  kənar şəxslərin seçki prosesinə müdaxilə halları daxildir. 

SMDT bəyan edir ki, peşəkar müşahidə təşkilatı kimi hazırkı seçkilərdə namizədlərə verilən səslərinin nəticələri deyil, prosesin hüquqi keyfiyyətinin qiymətləndirilməsi aparılır. 

Qeyd edək ki, SMDT 9 oktyabr 2013-cü il prezident seçkisi günü əməkdaşlıq etdiyi 794 nəfər müşahidəçi ilə Statistikaya Əsaslanmış Müşahidə (SƏM) metodologiyası əsasında seçki məntəqələrinin təşkili, səsvermə və səslərin sayılması prosesinin monitorinqini həyata keçrib. SƏM metodologiyası  ölkə üzrə keçirilən seçkilərin sistemli, dəqiq və qərəzsiz qiymətləndirilməsinə imkan verən elmi, təsdiq olunmuş müşahidə metoddur. SMDT ölkə üzrə 15% seçki məntəqəsini əhatə edən təlimatlandırılmış və bitərəf müşahidəçiləri sistematik yolla yerləşməsini təmin edib. -06D-