Tural Mustafayev Qərb diplomatik missiyalarından müvəqqəti sığıncaq istəyir (video) (YENİLƏNİB)

Jurnalist Tural Mustafayev Baş Prokurorluğun Ağır Cinayətlərə dair İşlər üzrə İdarəsində dindirildikdən sonra Turan-a bildirib ki, onun çağırılması 1 may tarixli videomüraciətlə bağlı olub. Müraciətdə o, jurnalist Xədicə İsmayılovaya təzyiq və şantaj altında böhtan atdığını etiraf edib.

Mustafayev iddia edir ki, mayın 5-də dindirmə zamanı o, “yüngül formada” təzyiqə məruz qalıb.

Eyni zamanda, müstəntiq Sənan Paşayev ondan istintaq sirrinin yayılmaması haqqında iltizam götürüb.

Prokurorluq hesab edir ki, Mustafayev öz videomüraciət ilə istintaq sirrini pozub, onun ifadələri isə əsassızdır. Xüsusən, müstəntiq Mustafayevin istintaqda İsmayılovanın təqsirinin sübutu olmadığını haradan bildiyi ilə maraqlanıb.

Müstəntiq həmçinin Mustafayevin fevralın 27-də Baş Prokurorluqda dindirmə zamanı MTN-in Xüsusi Təyinatlı Qüvvələrinin əsgəri Elməddin Məmmədovun iştirak etdiyi haqqında bəyanatını təkzib edib.

“Mənə deyiblər ki, o, MTN əməkdaşı deyil, istintaq qrupunun üzvüdür və məhkəmə prosesində iştirak edəcək”, deyə Mustafayev bildirib.

Mustafayev bir daha bildirib ki, İsmayılovaya qarşı şikayətindən imtina edir, amma buna cavabda ona deyiblər ki, “məhkəməyə qədər hələ fikrini dəyişə bilər”.

Mustafayev Baş Prokurora müraciətinə cavabla maraqlandıqda ona bildiriblər ki, istintaq yekunlaşmaq üzrədir və o, öz mövqeyini məhkəmədə bildirə biləcək.

Mustafayevdən həmçinin bundan sonra KİV-də bəyanatlarla çıxış etməməyi tələb ediblər.

Buna görə Mustafayev öz təhlükəsizliyinə görə narahatdır və KİV vasitəsilə Aİ nümayəndəliyinə və ABŞ səfirliyinə heç olmasa məhkəməyə qədər onun təhlükəsizliyini təmin etmək xahişi ilə müraciət edir. O, həmçinin diplomatik nümayəndəliklərə rəsmi müraciət etmək niyyətindədir. -06D-

2015 May 05 (Çərşənbə axşamı) 16:46:59

Jurnalist Tural Mustafayev mayın 5-də Turan-a müsahibəsində Xədicə İsmayılovaya qarşı şikayətindən imtina etməməsi üçün ona qarşı psixoloji və fiziki təzyiqlərin davam etdiyini bildirib.

Aprelin 7-də o, İsmayılovaya qarşı iddialarından imtina etdiyi haqqında ərizə yazıb və onu baş prokuror Zakir Qaralova göndərib. O, aprelin 26-da Ağır Cinayətlərə dair İşlər üzrə İstintaq İdarəsinin rəisi Eldar Əhmədovun imzası ilə cavab alıb. Sonuncu bildirib ki, “ərizəyə qısa vaxtda cavab veriləcək”.

Mustafayev yenə təkrar edib ki, onu İsmayılovaya qarşı ifadə verməyə məcbur ediblər. Belə ki, o, bəyanatı Bakı prokurorunun birinci müavini Azər Əsgərovun diktəsi ilə yazıb.

Mustafayev əvvəllər kirayə qaldığı mənzildə gizli çəkilmiş videomateriallarla şantaj edilib. “Bütün qonaqlarım videoya çəkilib. Məni bununla şantaj edərək, Xədicə İsmayılovaya qarşı ifadə verməyə məcbur ediblər”, deyə Mustafayev bildirib.

Həmin videolara çəkilənlərdən biri – İsa Şahmarlı (LGBT nümayəndəsi) bir ay sonra intihar edib. Mustafayev onun ölümündə təqsirli olmaqda, habelə Gürcüstanın Tekali kəndində ermənilərlə görüşməkdə ittiham etməklə hədələyiblər.

“Dekabrın 27-də Qəbələ Hava limanından Moskvaya gedirdim. Amma mənə hava limanından bildirdilər ki, ölkədən çıxışıma qadağa qoyulub. Mən elə oradaca bildirdim ki, şikayətimi geri götürürəm. Və Göyçaya, valideynlərimin evinə qayıtdım. Bundan sonra MTN-in Antiterror Mərkəzinin rəhbəri İlqar Əliyev atama zəng etməyə başladı. Bu arada mən şikayətdən imtina haqqında ərizə hazırladım, amma göndərməyə çatdırmadım, çünki evin önündə polis əməkdaşları və iki MTN işçisi məni saxladı”, deyə Mustafayev bildirib.

Onu Bakıya aparıblar və SPACE TV teleşirkətinin qarşısında kirayə evdə saxlayıblar. “Mən fevralın 14-nə qədər telefonsuz və İnternetsiz ev dustaqlığında saxlanmışam. O günə qədər dirəniş göstərirdim, şikayətimdən imtina etdiyimi bildirirdim. Ayın 14-də xüsusi təyinatlılar gəldilər, məni döydülər və maşına oturdub, başıma torba keçirib 1 nömrəli Psixiatriya Xəstəxanasına, nevrologiya şöbəsində Leyla xanımın yanına apardılar. Orada mənə məcburi şəkildə psixotrop preparat iynələri vurdular. Məni MTN-in Valeh Məmmədov adlı əməkdaşı kimi qeydiyyata aldılar. Döyülmələr nəticəsində kürəyimdəki yaradan qanaxma başladı və məni əməliyyat etdilər”, deyə Mustafayev sözünə davam edib.

Onu həbs edə bilərlərmi? Bu suala cavabda Mustafayev bildirib ki, ona qarşı 296-cı (cinayət törədilməsi haqqında qəsdən məlumat vermə) maddə irəli sürə və 3 il müddətinə azadlıqdan məhrum edə bilərlər.

“Biz Xədicə ilə dost idik və mən ona hörmət edirəm. Dəfələrlə onların evində olmuşam və yaxşı münasibətlərimiz var idi”, deyə Mustafayev bildirib.

Çərşənbə axşamı, mayın 5-də Mustafayev yenidən Baş Prokurorluğun Ağır Cinayətlərə dair İşlər üzrə İstintaq İdarəsinə çağırıblar.

Xatırladaq ki, Mustafayevin özünü öldürmə həddinə çatdırma haqqında şikayəti əsasında 2014-cü il dekabrın 5-də məşhur jurnalist Xədicə İsmayılova həbs edilib. -16/03D-