Valideynlər mübarizəni davam etdirirlər

Övladları 2010-2013-cü illərdə hərbi xidmətdə dünyalarını dəyişən bir qrup valideyn çərşənbə axşamı RATİ-də mətbuat konfransı keçirib.

Sonuncu dəfə bu il fevralın 20-də mətbuat konfransı keçirən valideynlər o zamandan bu yana yenə də övladlarının ölümlərinə aydınlıq gətirilməməsindən şikayət ediblər. İsmayıl İbadovun, Elxan Əzizovun, Elçin Kərimbəylinin və s. valideynləri Ali Məhkəmə ilə apellyasiya məhkəmələri arasında qaldıqlarını nəzərə çatdırıblar. “Bir çox valideynlər dərdə dözməyib dünyalarını dəyişiblər, bir qismi xəstədir, bir qismi də imkansız olduğu üçün hərəkət edə bilmir”, - deyə “Atəşkəs Qurbanları” ictimai birliyinin sədri Bəyaki Əzizov qeyd edib.

Bəzi valideynlər isə yeni müdafiə naziri Zakir Həsənovdan narazı qaldıqlarını deyiblər. Belə ki, yeni nazir vəzifəyə gələndən əsgər ölümlərinin çox olduğu hərbi hissələrin komandir və zabitlərinin hərbi rütbələrini artırıb. Bu şəxslər sırasında konkret əsgər ölümlərində rolu olanların belə adları var. “Yeni nazir gəlsə də, əsgər ölümləri azalmayıb, bundan sonra da azalmayacaq, çünki problem Müdafiə Nazirliyində yox, ölkənin idarə edilməsi üsulundadır”, - deyə Əli Kərimbəyli bəyan edib. Bu ilin 6 ayı ərzində ölkə ordusunda 47 itki olduğu, bu 47 itkinin 37-sinin məhz qeyri-döyüş itkiləri olduğu xatırladılıb.

Valideynlər ölkə idarəetmə müəssisələrinə müraciətlərinin cavabsız qalmasından, biganəlik və hörmətsizikdən şikayətçi olublar. Verdikləri təklif və ideyalarla bağlı onlara cavab verilməməsinə diqqət çəkiblər. Valideynlər övladlarına şəhid statusu verilməsi, sığortalarının ödənilməsi kimi təklifləri yenə də qüvvədə saxlayıblar. Bu ölümlərlə bağlı heç kəsin həbsə alınmadığı xüsusi vurğulanıb. Müraciət olunan məmurlar ən yaxşı halda problemi həll etməyə səlahiyyətləri olmaması kimi qeyri-müəyyən cavablar veriblər.

Amma valideynlər hətta belə biganəliyin də onları soyuda bilməyəcəyini, övladlarının taleyinə aydınlıq gətirilənə qədər mübarizənin davam edəcəyini söyləyiblər. -05C-