Vəkil Beynəlxalq Bankın keçmiş rəhbəri Cahangir Hacıyevin «Nardaran işi» üzrə məhkəməyə çağırılmasını təklif edib

Bakı/18.11.2016: Noyabrın 18-də  Bakı Ağır Cinayətlər Məhkəməsində "Müsəlman Birliyi" Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin cinayət işi üzrə növbəti məhkəmə iclası keçirilib.

Əlövsət Abbasovun sədrlik etdiyi iclasda təqsirləndirilən şəxs A.Hüseynov bildirib ki, ötən iclasda hakim Ə.Abbasov onun suallarını kəsdiyi üçün bu barədə Bakı Ağır Cinayətlər Məhkəməsinin sədrinə yazılı şikayət edib: “Siz noyabrın16-da məhkəmə prosesində bizi təhdid edib dediniz ki, hamınız cavabınızı alacaqsınız. Siz qanun pozuntusuna yol vermisiniz. Digər şikayətim isə odur ki, şahid qismində dindirilən Sabunçu Rayon Polis İdarəsinin sahə müvəkkili Emin Babayevə verdiyim sualları çıxardınız və sözümü kəsdiniz”.

Hakim Ə. Abbasov isə onları təhdid etmədiyini bildirib: “Mən demişəm ki, burada şüşəni sındırmaq istəyənlər, məhkəmə qayda-qanununu pozan şəxslər cəzalandırılacaq".

Məhkəmə zamanı  noyabrın 26-da Nardaranda baş verən hadisələrdə ölən 4 nəfərin qəbirlərinin dağıdılması məlum olub. Cabbar Cabbarov öz çıxışında bildirib ki, şahidlərə təzyiqlər edirlər, işgəncə verirlər, məhkəmə prosesində olan şəxslərin evinə gedirlər, bölməyə çağırıb təhdid edirlər. “Biz sizə dedik ki, bununla bağlı tədbir görün. İndi də bunlar ölən 4 kənd sakininin qəbrinin üstünü sökürlər. Bundan dövlətin xəbəri yoxdur? Əgər xəbəri yoxdursa bu,özbaşınalıqdır. Yox, əgər xəbəri varsa gəlsinlər bizlə etsinlər söhbətlərini, şəhidlərimizdən uzaq dursunlar”.

Hakim Ə.Abbasov bununla bağlı prokurorluğa, müvafiq qurumlara müraciət etmələrini məsləhət görüb. C.Cabbarov isə bu məsləhətin mənasız olduğunu deyib.

Daha sonra Taleh Bağırzadə qəbirlərin dağıdılmasının vandalizm əlaməti olduğunu bildirib. Abbah Hüseyn qəbirlərin dağıdılmasıyla bağlı çıxışında deyib: “92-93-də bizim Qarabağdakı qəbirləri ermənilər dağıtdı, indi də bunlar dağıdır”.

Vəkil Yalçın İmanov Nardaranda əməliyyatına rəhbərlik edən Kərim Əlimərdanovun və “Beynəlxalq Bank”ın rəhbəri, həbdə olan Cahangir Hacıyevin məhkəməyə çağırılmasını istəyib. O bildirib ki, Abbas Hüseynov Baş Mütəşəkkil Cinayətkarlığa Qarşı Mübarizə İdarəsində C. Hacıyevlə eyni kamerada saxlanılıb və o, Abbas Hüseynə verilən işgəncələri görüb.

Hakim bildirib ki, vəsatətlər müzakirə olunacaq.

Növbəti məhkəmə prosesi noyabrın 23-də davam edəcək.-36D-