![Vəkillər müdafiə etdikləri şəxslərə bəraət istədilər](https://turan.az/resized/media/2015/main/082500127358-750-500-resize.webp)
Vəkillər müdafiə etdikləri şəxslərə bəraət istədilər
AMAY şirkətinin qurucusu Abdulla Abdullayev və onunla birgə təqsirləndirilən daha 5 nəfərin çərşənbə axşamı keçirilən məhkəmə prosesində vəkillər çıxış ediblər.
Vəkillər irəli sürülən ittihamları əsassız və qanunsuz sayaraq, ittiham tərəfin müttəhimlərin təqsirliliyini sübut edə bilmədiklərini deyərək cinayət işinə xitam, müttəhimlərə isə bəraət verilməsini tələb ediblər. Vəkillər istintaqı mülki işi cinayət işinə çevirməkdə ittiham ediblər. Onlara görə, bu məsələ istənilən halda həllini mülki qanunvericiliyin tələblərinə uyğun tapmalı idi.
Eyni zamanda vəkillər cinayət materiallarının savadsız tərtib olunmasına iraddan tutmuş bu cinayət işini başlamaq üçün əsas olmamasına qədər etirazlarını ifadə ediblər.
AMAY şirkətinin qurucusu A.Abdullayevin vəkili Əkbər Bağırov ittiham tərəfin təqsirliliyi təsdiq etmək üçün bir sübut belə təqdim etmədiyini vurğulayıb. Buna baxmayaraq, 6 nəfərə ağır cəza istəməsini ədalətdən çox uzaq davranış adlandırıb.
İstər “Texnikabank”dan, istər Sahibkarlığın İnkişafına Kömək Milli Fondundan götürülən kreditlərin AMAY tərəfindən bağlandığını deyən vəkil bundan sonra ağır cəza istənilməsinə əsas olmadığını qeyd edib. Həm də vəkil xatırladıb ki, “Texnikabank”a olan 40 milyon manat hələ 2012-ci ildə bağlanıb. Vəkil artıq ödənmiş kreditə görə 2 il keçəndən sonra cinayət işi qaldırılmasının özünün başa düşülən məsələ olmadığını nəzərə çatdırıb. Ə.Bağırov bu məsələ üzrə hələ 2011-ci ildə məhkəmə qərarı olduğunu xatırladıb. Haqqında məhkəmə qərarı olan məsələ ilə bağlı təkrar cinayət işi qaldırılmasının qanunla yolverilməz olduğu ifadə edilib.
Vəkillər dələduzluq, səlahiyyətdən sui-istifadə, külli miqdarda mənimsəmə, çirkli pulların yuyulması üzrə ittihamların heç birinin məhkəmə araşdırmasında təsdiqini tapmadığını xüsusi qeyd ediblər. Həm də hakimə qərar çıxararkən məhkəmə araşdırmasının nəticələrinə isnad etməyin qanunvericilik tələbi olduğunu xatırladıblar. Vəkillər bütün kreditlərin Atatürk prospekti 30/78-80-də tikilən hündürmərtəbəli binanın tikintisinə, AMAY şirkətinə məxsus “Xətai” ticarət mərkəzinin tamamlama işlərinə xərcləndiyini bildiriblər. Xərclənən vəsaitlərin şəxs olaraq kimsə tərəfindən mənimsənilməsinin aşkar olmadığını söyləyiblər.
144 milyon manat vəsaitin A.Abdullayev tərəfindən İran vasitəsilə leqallaşdırılmasına dair hər-hansı sübut olmamasına diqqət çəkilib. Bununla bağlı ittiham tərəfin bir sübut belə ortaya qoya bilmədiyini ifadə ediblər.
Müttəhimlərə son söz söyləmək imkanı veriləndə onlar hazırlaşmaq üçün vaxt istəyiblər. Hakim Əfqan Hacıyev məhkəmə prosesini sentyabrın 1-i saat 14:00-a təyin edib.
AMAY şirkətinin qurucusu A.Abdullayev, şirkətin əməkdaşları olmuş Elşən Novruzov, Mehman Məmmədxanlı, Heydər Rzayev, Anar Əliyev, Vidadi Qurbanov və Nadejda İlyasova dələduzluqda, dövlət vəsaitlərini külli miqdarda məniməsməkdə, səlahiyyətlərindən sui-isitfadə etməkdə ittiham edilirlər.
Avqustun 18-də çıxış edən ittihamçı Fərid Nağıyev A.Abdullayevə 14, E.Novruzova 10, Anar Əliyevə 10, Heydər Rzayevə, Vidadi Qurbanova 10, Nadejda İlyasovaya 9 il həbs cəzası istəyib. -05C-
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz