Vətən Müharibəsindən sonra Azərbaycanın müdafiə və təhlükəsizlik sektorunun itkiləri 110 nəfər təşkil edib

Bakı/31.01.22/Turan: 2020-ci ilin ikinci yarısında baş vermiş Vətən Müharibəsindən sonra (2020-ci ilin noyabrın 10-dan 2022-ci ilin 31 yanvarınadək) Azərbaycanın Təhlükəsizlik və Müdafiə Sektorunun hərbi itkiləri 110 nəfərdən artıqdır. Bu barədə Xəzər Hərbi Tədqiqatlar İnstitutu məlumat verir.

Onlardan 15 nəfəri erməni gülləsindən, 10 nəfəri mina partlayışından, qalanları isə (85 nəfər) qeyri-döyüş səbəblərindən dünyalarını dəyişiblər. Hadisələrin əksəriyyəti Müdafiə Nazirliyi və digər güc strukturları tərəfindən təsdiq olunub.

Erməni gülləsindən həlak olan 15 nəfərdən və minaya düşən 10 nəfərdən başqa, 14 nəfər heikopter qəzası, 12 nəfər avtoqəza, 12 nəfər bədbəxt hadisə nəticəsində, 10 nəfər müxtəlif xəstəliklərdən, 9 nəfər naməlum səbəbdən, 9 nəfər Vətən Müharibəsində aldığı xəsarətlərdən, 5 nəfər qeyri-nizamnamə hadisəsindən, 2 nəfər əməliyyat tədbirində dünyasını dəyişib. 12 nəfər isə intihar edib.

Ümumi itkilərin 84-ü, o cümlədən 11 döyüş və 73 qeyri-döyüş itkisi 2021-ci ilin oayına düşüb.

Müharibədən öncəki 2019-cu ildə Azərbaycanın Təhlükəsizlik və Müdafiə sektorunda 47 hərbi qulluqçu dünyasını dəyişmişdi. Onlardan 9 nəfəri döyüş, 38 nəfəri isə qeyri-döyüş itkisi idi.

2022-ci ilin yanvar ayında itkilər 11 nəfər təşkil edib, o cümlədən 1 hərbiçi erməni gülləsindən, 3 nəfər qeyri-nizamnamə hadisələri nəticəsind, 2 nəfər naməlum səbəbdən, 3 nəfər xəstəlikdən, 1 nəfər bədbəxt hadisə nəticəsində həlak olub, 1 nəfər isə intihar edib. 

Xəzər Hərbi Tədqiqatlar İnstitutunun araşdırmalarına görə, Azərbaycan Təhlükəsizlik və Müdafiə Sektorunda hərbi itkilərin sayı ciddi şəkildə artır. Xüsusilə də qeyri-döyüş şəraitində olan itkilər diqqət çəkir. İntiharlar, texniki qəzaların nəticəsində onlarla hərbi qulluqçunun dünyasını dəyişməsi güc strukturularını təxirəsalmaz tədbirlər görməyə vadar etməlidir.

Xəzər Hərbi Tədqiqatlar İnstitutu 2015-ci ilin yanvarından fəaliyyət göstərir. Təşkilata hərbi ekspert Cəsur Sümərinli rəhbərlik edir. -06D-