Zaur Həsənov korrupsiya qurbanı oldu

Qarabağ müharibəsi əlili Zaur Qurbanovun özünü yandırması hadisəsi təkcə misli görülməmiş insan hüquqlarının pozulması faktına dəlalət etmir. Hadisənin kökündə Bakıda torpaq üzərində mülkiyyət bölgüsünün olmaması problemi durur ki, bunun səbəbi də korrupsiyadır. Bu fikri Turan-ın müxbiri ilə söhbətində “İqtisadi təşəbbüslərə yardım” QHT-nin direktor müavini Rövşən Ağayev bildirib.

Onun fikrincə, Həsənov məhz mülkiyyət bölgüsü ilə bağlı qarışıqlıq səbəbindən AHİK qurbanı olub. O, bələdiyyə ilə müqavilə bağlayıb, sonradan bu müqavilə Həmkarlar İttifaqları Konfesderasiyasının iddiası əsasında qanunsuz elan olunub. Nəticədə əlilin kafesi sökülüb.

“1999-cu ildə bələdiyyə institutu yaradıldığı vaxtdan etibarən paytaxt ərazisində və şəhərkənarı ərazilərdə yaradılmış bələdiyyələrin torpaq mülkiyyəti müəyyən edilməyib. Baxmayaraq ki, qanuna əsasən, onlara torpaq verilməli, bələdiyyə mülkiyyəti göstərilməklə, coğrafi xəritələr müəyyən edilməli idi. Korrupsiyaya uğramış məmurlar buna mane olub. Qanunvericiliyə əsasən, mənzil inşaatı yalnız bələdiyyə torpaqlarında aparıla bilər. Buna görə, torpaq bələdiyyələrə verildikdə Bakı şəhər İcra Hakimiyyəti və paytaxt rayonları administrasiyası onlara qeyri-qanuni gəlirlər gətirən bu səlahiyyətləri əldən verir”, deyə Ağayev bildirib.

Digər tərəfdən, “torpaq bölgüsü ilə bağlı xaos və qarışıqlıq şəraitində bələdiyyələr də qanunsuz əməllərə əl atır və boş sahələri satır və ya icarə verir”, deyə o, sözünə davam edib.

Təcrübədə bu, münaqişələrə gətirib çıxarır. Aydın olur ki, bu torpaqlarla bağlı nüfuzlu dövlət qurumlarının iradları var.

Məsələn, dövlət neft şirkəti SOCAR hələ sovet dövründə onun balansına verilmiş torpaq sahələri üzərində nəzarətin bərpası bəhanəsi ilə Bakının müxtəlif qəsəbələrində sakinləri evlərindən köçürür. Baxmayaraq ki, bu insanların əksəriyyətinin bələdiyyələrlə müqavilələri var.

Eyni şey AHİK “Kurort” SC-yə də aiddir. Şirkət sovet vaxtı biznesmenin kafesinin yerləşdiyi ərazini alıb. Sahə uzun illərdir vətəndaşın faktiki istifadəsində idi və indi onun əlindən torpaq sahəsini almaq doğru deyil, özü də onun bələdiyyə ilə müqaviləsi var idi.

Öz növbəsində, AHİK mətbuat və ictimaiyyətlə əlaqələr şöbəsinin rəisi Nazim Ağamirov bildirib ki, kafe AHİK “Kurort” SC-nin “Zığ” sanatoriyasının balansında olan ərazidə yerləşir.

Bu ərazi sövet dövləti tərəfindən hələ 1985-ci ildə sanatoriyaya verilib.

1990-cı illərin birinci yarısında Qarabağ müharibəsi ilə əlaqədar sanatoriya yaralıların və əlillərin müalicəsi və reabilitasiyası üçün verilib. Elə həmin vaxt kiçik obyektlər yaranıb.

Müharibədən və ölkədə həyat yoluna düşdükdən sonra sanatoriya həmkarlar ittifaqlarına qaytarılıb.

Həsənova dəfələrlə kafeni tərk etmək təklif olunub və son nəticədə iş məhkəməyə verilib. Məhkəmə ərazinin qanunsuz ələ keçirilməsi faktını etiraf edib. Əlilin şikayətləri hələ 2010-cu ildə Apellyasiya və Ali Məhkəmələr tərəfindən təmin edilməyib. Və yalnız indi məhkəmə qərarı icra edilib.

AHİK nümayəndəsinin iddiasına görə, bələdiyyə bu torpaq sahəsini idarə etmək hüququna malik deyildi və məhkəmə bunu təsdiq edib.

Turan agentliyinin direktoru Mehman Əliyev xatırladıb ki, bələdiyyələrə əvvəlcə yerli icra hakimiyyətlərinin sərəncamında olan torpaqlar verilib. 1998-ci ildən etibarən qanunvericiliklə rayon, o cümlədən paytaxt icra hakimiyyətlərinə torpaq sahələrini idarə etmək qadağan edilib. Amma onlar köhnə tarixlərə rəsmiləşdirərək, torpaq sahələrini satmağa davam ediblər. Bu mənada bələdiyyələr onlara mane olurdu və buna görə 2009-cu ildən etibarən bələdiyyələrin bu funksiyası qanunvericiliklə dondurulub.

Belə fırıldaqlara nümunə kimi 2003-2008-ci illərdə Buzovnada Prezident Administrasiyası nəzdində kənd təsərrüfatı müəssisəsinin min ha torpaq sahəsinin satışını göstərmək olar. Həmin vaxt müəssisə rəhbərliyi Əzizbəyov (Xəzər) rayon icra hakimiyyətinin 90-cı illərə aid sərəncamı əsasında köhnə tarixlə torpaq sahələri satırdı. Elə həmin vaxt Turan agentliyi minlərlə zeytun və badam ağacının məhvinə mane olmağa çalışırdı. Amma yerli məmurların əməlləri ən yüksək səviyyədə dəstək tapdı. -06B-