20 illik qətlin araşdırılması və ...

Bakı/18.03.21/Turan: “2001-ci ildə törədilən qətlin üstünün 20 ildən sonra açılması Azərbaycanda  hüquq sahəsindəki vəziyyətin göstəricisidir. Bunu keçmiş müstəntiq, hazırda  hüquq müdafiəçisi Rüfət Səfərov 2021-ci il martın 18-də Turan İnformasiya Agentlyinin “Çətin sual” proqramının “20 illik qətlin izi ilə” buraxılışındakı şərhində bildirib.

Keçmiş müstəntiq bəhs olunan qətl hadisəsilə bağlı deyir ki, Azərbaycan vətəndaşı Elçin Əliyev 2001-ci ildə qətlə yetirilib: “Bu qətl Ukraynanın paytaxtı Kiyevdə baş verib. Hələ o vaxtlar bu hadisə ilə bağlı Rövşən Əkbərovun adı hallanırdı. Hətta iki il sonra istintaq materialları Bakıya göndərilmişdi. Həmin istintaq materiallarında “şübhəli şəxsin Azərbaycanda olması” ifadəsi keçirdi”, - Rüfət Səfərov bildirib.

Rüfət Səfərova görə, ötən 20 il ərzində bu cinayət işi nəinki əsaslı araşdırılmayıb, hətta istintaq əməliyyat tədbirlərinin aparılması ləğv edilib. Onun fikrincə, belə hallar hakimiyyətdə güclü himayə olduqda mümkündür: “Görünür, o vaxtlar hakimiyyətdə kimsə onu müdafiə edib. Burada bu incə cəhət də var ki, belə “gözü kölgəli” adamları hakimiyyət rahat idarə edə bilir”, - hüquq müdafiəçisi deyib.  

Hüquq müdafiəçisinə görə, İkinci Qarabağ Mübaribəsindən sonra Rövşən Əkbərovun həbsə alınması hakimiyyətdə “qələminin sındırılması” ilə əlaqəlidir.

Rövşən Səfərov deyir ki, bu qətllə bağlı Elçin Əliyevin anası Səmayə Əliyeva 2011-ci ildə keçirdiyi mətbuat konfransında  general Rövşən Əkbərovun adını çəkərək onu qatil və cinayətkar adlandırmışdı. Keçmiş müstəntiq əlavə edir ki, Səmayə Əliyeva Qəbələ rayonunda əlində olan materialları dövlət basçısı İlham Əliyevə və birinci xanım Mehriban Əliyevaya verə bilmişdi. Onun sözlərinə görə, bu da nəticə verməmiş və cinayətin üstünün açılmasında irəliləyiş olmamışdı.

Keçmiş müstəntiq məsələnin hüquqi məsuliyyət tərəfi barədə də mövqeyini bidirib. O deyib ki, hadisənin üstündən 20 il keçsə də ötən müddətdə əsaslı araşdırma aparılmayıb: “Maraqlı budur ki, 20 il ərzində yetərli araşdırma aparılmır, cinayəti törədənin kimliyi müəyyən olunmur. Amma 2021-ci il martın 15-də Rövşən Əkbərov həbsə alınır və martın 17-də elan edilir ki, Rövşən Əkbərov 2001-ci ildə baş vermiş qətlə görə şübhəli bilinir. Deməli, 20 il ərzində kifayət qədər araşdırma aparılmır, amma Rövşən Əkbərov həbsə alındıqdan cəmi iki gün sonra onun bu məsələdə şübhəli olduğu müəyyən edilir”.

Hüquq müdafiəçisi deyir ki, belə vəziyyətə görə, həm Respublika Prokurorluğunun, həm Hərbi Prokurorluğun rəhbərliyi, həm istintaqı aparmış müstəntiqlərin məsulyyəti var, bu şəxslərin hazırda vəzifədə olub-olmamaları əhəmiyyət daşımır.

Onun fikrincə, belə vəziyyətin yaranması həm də Azərbaycanda hakimiyyətin hüquq siyasətinin hansı vəziyyətdə olduğunu göstərir.-05B-