Azərbaycanda hələ də siyasi məhbuslar var

Bakı/30.05.22/Turan: Prezident İlham Əliyevin mayın 27-də imzaladığı bir sıra məhbusların əfvi haqqında Sərəncama əsasən, 168 məhbus cəzasının qalan hissəsindən azad edilib. Bundan başqa, azadlıqdan məhrumetmə cəzasına məhkum edilmiş 36 nəfərin cəzasının qalan hissəsi yarıyadək azaldılıb, şərti cəzaya məhkum edilmiş 3 nəfər isə azad edilib. Eyni zamanda, azadlığın məhdudlaşdırılması cəzasına məhkum edilmiş 6 nəfər cəzasının qalan hissəsindən azad edilib. Sərəncam ümumilikdə 213 nəfərə şamil olunub.

Azad olunanlar arasında siyasi məhbuslar da var. Onlardan biri, çirkli pulların yuyulması ittihamı ilə həbs edilmiş Gədəbəy rayon İcra Hakimiyyətinin keçmiş başçısı, Azərbaycan Xalq Cəbhəsi Partiyasının (AXCP) fəalı Saleh Rüstəmlidir. Eyni zamanda, rüşvət tələb etmək ittihamı ilə həbs edilmiş Azel.TV portalının rəhbəri Əfqan Sadıqov da azad edilib. Daha bir siyasi məhbus - AXCP sədri Əli Kərimlinin sürücüsü Paşa Ümidov da azad edilib. Ümidov narkotik ittihamı ilə həbs cəzasına məhkum edilmişdi.

Bundan başqa, əfv olunanlar arasında Gəncə işi üzrə mühakimə olunanlar da var. Amma bu əfv siyasi məhbus problemini həll etməyib.

Niyə bütün siyasi məhbuslar azad edilməyib? 

“Çətin sual” proqramın bu və digər suallarını Bakı İnsan Hüquqları Klubunun rəhbəri Rəsul Cəfərov cavablandırır.

Cəfərovun sözlərinə görə, öz-özlüyündə əfv haqqında sərəncama bir hüquqi akt kimi mənfi qiymət vermək olmaz. Çünki söhbət insanların azad edilməsindən gedir.

"27 may tarixli Sərəncamda müsbət məqam ondan ibarətdir ki, bizim təqdim etdiyimiz siyahıda olan şəxslərin təqribən 40%-i azad edilib. Yəni 57 nəfərdən 22-si azadlığa çıxıb. Eyni zamanda, bizim siyahımıza daxil edilməmiş şəxslər azad edilib. Xüsusən, ömürlük həbsə məhkum edilmiş şəxs azad edilib. Bununla da ehtiyac olan ömürlük həbs olunanların əfvi təcrübəsi formalaşır", deyə hüquq müdafiəçisi qeyd edib.

Mənfi məqam isə, onun sözlərinə görə, siyasi motivlərlə həbs edilənlərin hamısının azad edilməməsindən ibarətdir.

"Gəncə işi üzrə (2018-ci il iyulun 3-də Gəncə sakini Yunis Səfərovun Gəncə şəhər İcra Hakimiyyətinin başçısı Elmar Vəliyevə qarşı sui-qəsd törətməsi. Güc qurumları bu sui-qəsdi terror aktı adlandırıblar və şübhəli bilinən şəxsi saxlayıblar, bu da kütləvi etirazlara səbəb olub - Turan İA-nın qeydi) biz 39 məhbusdan ibarət siyahı təqdim etmişdik. Onlardan 20-si azad edilib, 19-u isə həbsdə qalıb. Bu 19 nəfər arasında əfv olunanlarla eyni maddələr üzrə eyni müddətə həbs edilən, eyni humanitar əsaslara malik olan insanlar var idi".

Cəfərov qeyd edib ki, Bakı İnsan Hüquqları Klubunun hazırladığı siyahıdan 22 nəfər əfv olunub, onların 20-si Gəncə işi üzrə həbs olunanlar, 2-si isə AXCP üzvüdür.

"30 siyasi məhbus isə hələ də həbsdədir", deyə hüquq müdafiəçisi gileylənib. -0-