![EİTİ-dəki vəziyyət BVF-dən borc alınmasını çətinləşdirəcək – ekspert](https://turan.az/resized/media/2016/main/101400171772-750-500-resize.webp)
EİTİ-dəki vəziyyət BVF-dən borc alınmasını çətinləşdirəcək – ekspert
Azərbaycan Mədən Sənayesində Şəffaflıq Təşəbbüsündə (EİTİ) tamhüquqlu üzv statusunun bərpasına nail olmasa Bakı beynəlxalq maliyyə təşkilatlarından kredit almaqda problemlərlə üzləşəcək. Bu barədə Turan agentliyinin Çətin Sual verilişinə müsahibəsində Mədən Sənayesində Şəffaflıq Təşəbbüsü üzrə QHT Koalisiyasının əlaqələndiricisi Qubad İbadoğlu bildirib.
Azərbaycanın EİTİ-də gələcək taleyi məsələsinə təşkilatın idarə heyətinin oktyabrın 25-də Astanada keçiriləcək iclasında baxılacaq. Ötən ilin aprelində QHT-lərin fəaliyyəti üçün şəraitin pisləşməsi, fəalların, o cümlədən yerli şəffaflıq koalisiyasının üzvlərinin həbsi ilə əlaqədar Azərbaycanın statusu kiçildilmişdi.
Problemlərin aradan qaldırılması üçün koalisiya EİTİ-nin təkliflərini yerinə yetirmək çağırışı ilə İlham Əliyevə müraciət edib. Amma hələlik hakimiyyətdən cavab daxil olmayıb, deyə ekspert bildirib.
Bu ilin yazında koalisiyanın üzvü olan QHT-lərin problemlərin həlli prosesi nəzərdə tutulmuşdu, amma atılmış addımlar ardıcıl və sistemli olmayıb və vətəndaş cəmiyyətinin problemləri həllini tapmayıb.
“Belə ki, koalisiya iştirakçılarının qrant müqavilələri Ədliyyə Nazirliyi tərəfindən qeydiyyata alınmayıb, buna görə QHT-lər öz bank hesablarındakı vəsaitlərdən istifadə edə bilmirlər.
İki təşkilatın qrantları vergi borcu kimi silinib, daha altı QHT vergi sanksiyaları ilə əlaqədar işləyə bilmir”, deyə İbadoğlu sözünə davam edib.
Bundan başqa, iki koalisiya üzvü – AXCP rəyasət heyətinin üzvü Asif Yusifli və AXCP sədr müavini Fuad Qəhrəmanlı hələ də həbsdədir. Bununla yanaşı, koalisiyanın daha bir üzvü – Oqtay Gülalıyev barəsində cinayət işinə xitam verilməyib və o, ölkədən çıxa bilmir.
Hazırda koalisiyada 150 vətəndaş cəmiyyəti fəalı var. Amma maliyyələşmə olmadığına görə bir çox layihələr dayandırılıb. Koalisiya iclasların keçirilməsi ilə kifayətlənir və monitorinq və ictimai debatlar keçirə bilmir.
Qalan müddət ərzində vəziyyət yaxşıya doğru dəyişməsə, Azərbaycana yeni islah proqramı təklif olunacaq. Və ya, ən pis halda ölkə EİTİ-dən çıxarıla bilər.
Hər iki halda ölkə Dünya Bankından, BVF-dən, AYİB-dən və s. kredit almaqda problemlərlə qarşılaşacaq.
Bu, ölkənin vəziyyətini daha da çətinləşdirəcək və xarici investisiyaların cəlb olunmasını çətinləşdirəcək, deyə o qeyd edib. -06D-
-
- İqtisadiyyat
- 15 Oktyabr 2016 11:28
-
- İqtisadiyyat
- 15 Oktyabr 2016 11:45
Çətin sual
-
Növbədənkənar parlament seçkilərinə 2 gündən az vaxt qalıb. Bu gün təbliğat və təşviqatın son günüdür.
-
Azərbaycanın xarici dövlət borcu azalıb, daxili dövlət borcu artıb.
-
Rəsmi Bakı Avropa Şurası Parlament Assambleyasında (AŞPA) Azərbaycan nümayəndə heyətinin əleyhinə səs verən şəxsləri “arzuolunmaz şəxslər” siyahısına salıb.
-
Avqustun 23-də Daşkənddə Prezident İlham Əliyev və Özbəkistan Prezidenti Şavkat Mirziyoyevin iştirakı ilə Azərbaycan-Özbəkistan arasında müttəfiqlik sənədi imzalanıb.
Rəy yaz