Əsirlərin minalanmış ərazilərin xəritələrilə mübadiləsi prosesində Rusiyanın iştirak etməməsi Ermənistan hökumətinin qərarıdır

Bakı/14.06.21/Turan: Konfliktoloq Elxan Mehdiyev Turan İnformasiya Agentliyinin “Çətin sual” proqramında iyunun 12-də 15 erməni hərbi əsirin qarşılığında Ağdam rayonunda 97 min tank əleyhinə və piyada əleyhinə minanın basdırıldığı ərazilərin xəritələrinin Ermənistan tərəfindən verilməsini şərh edib.

Ekspertin sözlərinə görə, Azərbaycana verilən minalanmış ərazilərin xəritələri mövcud xəritələrin çox kiçik bir hissəsidir. Belə ki, Ermənistanın baş naziri vəzifəsini icra edən Nikol Paşinyan növbədənkənar parlament seçkiləri ərəfəsində Ermənistanın Qeqarkunik vilayətinin Karmir Qüx kəndində mitinqdə çıxış edərkən tamamilə haqlı imiş: "Demək olmaz ki, bu, cüzi hissədir, amma bu, kiçik bir hissədir".

Mehdiyev həmçinin qeyd edib ki, reallıqda Ağdamda basdırılan minalar daha çoxdur. Ölkə prezidenti İlham Əliyev milyon rəqəmini təsadüfən səsləndirməyib. Bundan əlavə, təqdim olunan xəritələrin etibarlılığı ciddi şübhə doğurur.

Ermənilər Ağdam rayonu ərazisini minalayarkən SSRİ Silahlı Qüvvələrinin Nizamnaməsinə uyğun olaraq minalanmış sahələrin xəritələrinin surətini Baş Qərargaha (digər surəti isə təbii ki, müdafiənin dərinliyində və ya cəbhə xəttində yerləşən hərbi hissədə  qalıb – qeyd red.) vermələri də fakt deyil. Nəticə etibarı ilə xəritələr vahid nüsxədə ola bilərdi və asanlıqla yoxa çıxa bilərdi - intensiv döyüş əməliyyatları zamanı ermənilər xəritənin hayında deyildilər.

15 əsir təxribatçının minalanmış ərazilərin xəritələrilə mübadiləsi prosesində ABŞ, Avropa institutları və Gürcüstanın fəal iştirakının əksinə olaraq, Rusiyanın iştirak etməməsinə gəlincə, bu, Ermənistan hökumətinin qərarı idi. Çox güman ki, bu, Ermənistanda Paşinyan komandası ilə Rusiyapərəst qüvvələr arasında gedən hakimiyyət uğrunda mübarizənin təzahürüdür. Çətin ki bu, Rusiyanın xoşuna gəlsin və heç bir şübhə yoxdur ki, o, bunu Paşinyan hökumətinin yadına sala bilər, - konfliktoloq hesab edir.

Ermənilərin minalanmış sahələrin xəritələrini alver predmetinə çevirməsinə gəlincə, bu, birbaşa onunla əlaqədardır ki, 10 noyabr tarixli üçtərəfli saziş tələm-tələsik imzalanıb. Çox güman ki, buna görə minalanmış xəritələrin verilməsi barədə maddə sazişə daxil edilməyib. –0—