“Münasibətlər korlanır” - politoloq Azərbaycan-Rusiya münasibətləri haqda

Bakı/19.04.21/Turan:  Azərbaycanla Rusiya arasında nə baş verir? Bu barədə politoloq Əhməd Əlili Turan-ın “Çətin Sual” proqramının 2021-ci il 19 aprel tarixində efirə getmiş buraxılışında bildirib. 

Politoloq hesab edir ki, Azərbaycan-Rusiya münasibətləri “soyumağa” başlayıb, belə ki, rəsmi Kreml indiyə kimi Bakının Ermənistana “İskəndər-M” raketini kimin vermiş olduğu sualını  hələ də cavablandırmayib.

Politoloqun fikincə, Rusiya bunu hərbçilər, ekspertlər şəklində həll etmək istəyir və bundan artıq ictimailəşdirməyə açıq olmaq istəmir. Əhməd Əliliyə görə, ola bilər ki, Rusiya tərəf bundan artıq açıqlama verməsin.

Amma ekspertləri belə bir məsələ düşündürür ki, erməni tərəf rüşvət verərək bu raketləri ala bilərdi və bu, variantların ən pisidir. Bu halda Rusiya ordusu bütün bölgə üçün ciddi təhlükə zonası sayıla bilər.          

Politoloqa görə, bu il iyunun 15-nə kimi Rusiyadan 120 min azərbaycanlının çıxarılacağı barədə Rusiyanın daxili işlər nazirinin müavininin bəyanatı da həmin münasibətlərin qaydasında olmamasını göstərir. Amma politoloqlar hesab edirlər ki, 120 min adamın Rusiyadan çıxarılması Azərbaycana təzyiqdir,  amma bu, tutarlı təzyiq deyil, elə bu da onu göstərir ki, iki ölkə arasındakı münasibətlərdə soyuqlaşma hiss olunmaqdadır.

Əhməd Əlili əlavə edib ki, eyni zamanda Türkiyə-Rusiya, Azərbaycan, Rusiya, Ermənistan münasibətləri də 44 günlük İkinci Qarabağa Müharibəsindən sonrakı kimi qalmayıb, dəyişikliklərə uğrayıb. “İndi Azərbaycan “dəhlizlər siyasəti”, kommunikasiyalar siyasəti yürüdür, əlində təsir mexanizmləri var”, - politoloq bildirir. 

Onun deməsinə görə, həm də Azərbaycan iri əraziyə sahib olduğu üçün tərəflərə təsir göstərməyi bacarır.

Əhməd Əlili hesab edir ki, Ermənistan bir zamanlar Rusiyanın əlində Azərbaycana qarşı alət idi, indi alət olmaqdan da çıxıb. “İndi heç bir halda onun yenidən alət olmasına imkan verilməməlidir” deyə politoloq hədəfi göstərib.    

Politoloq deyib ki, indi mərhələ-mərhələ problemlər ortaya çıxır, amma  bu da çətin məsələ deyil.

Əhməd Əlili vurğulayıb ki, əslinə qalarsa Türkiyə-Rusiya münasibətləri də get-gedə soyuqlaşır və həm də bunu belə cavablandırır ki, hər iki dövlət dünya miqyasında maraqları olan ölkələrdir və onların münasibətləri donuq şəkildə qala bilməz, müəyyən mənada hərəkətdə olmalıdır.

Türkiyə-ABŞ münasibətlərinə toxunan politoloq deyib ki, bu iki dövlət arasında münasibətlər daha çox “arxaqapı diplomatiyası” düsturu ilə fəaliyyətdədir və əlbəttə, Avropa Türkiyənin Rusiyaya mülayim güc nümayiş etdirməsində maraqlıdır. -05D-